വാടാനപ്പള്ളി: രുചിയുള്ള ആഹാരം തേടിപോയതാണ് മലയാളികളെ രോഗികളാക്കി മാറ്റിയതെന്ന് പ്രമുഖ ചലച്ചിത്ര താരം ശ്രീനിവാസന്‍. തളിക്കുളത്തെ സമ്പൂര്‍ണ ജൈവ പച്ചക്കറി ഗ്രാമമാക്കി മാറ്റുന്നതിന്റെ ഭാഗമായി തളിക്കുളത്ത് നടന്ന ഗാന്ധി ഹരിത സമൃദ്ധി പരിപാടി ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. അര്‍ബുദം മാറ്റാന്‍ അലോപതി മരുന്നുകള്‍ക്ക് പുറകെ പോകുന്നവര്‍ കയ്യിലെ പണം കൊടുത്ത് മരണം ഇരന്ന് വാങ്ങുകയാണന്നും ശ്രീനിവാസന്‍ പറഞ്ഞു. അര്‍ബുദത്തിന് അലോപതിയേക്കാള്‍ മികച്ച ചികിത്സ ആയുര്‍വേദത്തിലും, ഹോമിയോപതിയിലും, നാച്ചറോപതിയിലും ഉണ്ടന്നും അദ്ദേഹം പറഞ്ഞു. നല്ല ഭക്ഷണം കഴിക്കാന്‍ മലയാളികള്‍ ശീലിണമെന്നും, പച്ചകറികളും പഴങ്ങളും പച്ചക്ക് കഴിച്ചാല്‍ അത്രയും ഗുണമുണ്ടാകുമെന്നും കുറച്ച് വ്യായാമവും നല്ല ഭക്ഷണവും ശീലിച്ചാല്‍ രോഗത്തെ അകറ്റി നിര്‍ത്താമെന്നും ശ്രീനിവാസന്‍ കൂട്ടിചേര്‍ത്തു. മുന്‍ എം.എല്‍.എ ടി.എന്‍ പ്രതാപന്റെ വീട്ടുമുറ്റത്താണ് ചടങ്ങ് സംഘടിപ്പിച്ചത്.
ഗാന്ധി ഹരിത സമൃദ്ധി സംസ്ഥാന ചീഫ് കോഡിനേറ്റര്‍ അനില്‍ അക്കര എം.എല്‍.എ അധ്യക്ഷനായി. വാര്‍ഡ് തല കൂട്ടുകൃഷിയുടെ വിത്ത് മുന്‍ ഗ്രാമപഞ്ചായത്ത് പ്രസിഡന്റ് പി.ഐ ഷൗക്കത്തലി സ്വീകരിച്ചു. വനിത കുടുംബകൃഷിക്കുള്ള തൈകള്‍ വിവിധ വാര്‍ഡ് ഹരിത സമൃദ്ധി അംഗങ്ങള്‍ ഏറ്റുവാങ്ങി. കാര്‍ഷിക സര്‍വകലാശാല ശാസ്ത്രജ്ഞ പ്രൊഫ. പി.സുശീലക്ക് ഗാന്ധി ഹരിത പുരസ്‌കാരം നല്‍കി ആദരിച്ചു. നാട്ടിക ഗ്രാമപഞ്ചായത്ത് പ്രസിഡന്റ് പി.വിനു, കൊടുങ്ങല്ലൂര്‍ ടെക്‌നിക്കല്‍ സ്‌കൂള്‍ കാര്‍ഷിക വിഭാഗം മേധാവി വി.മനോജ്കുമാര്‍, ജോസ് വള്ളൂര്‍, കെ.എ ഹാറൂണ്‍ റഷീദ്, കെ.വി ദാസന്‍, അനില്‍ പുളിക്കല്‍, കെ. ദിലീപ്കുമാര്‍, സി.എം നൗഷാദ്, ഗാന്ധി ഹരിത സമൃദ്ധി ചെയര്‍മാന്‍ ബാബു വല്ലത്ത് തുടങ്ങിയവര്‍ സംസാരിച്ചു. വനിതാ കുടുംബകൃഷിക്കായി പഞ്ചായത്തിലെ ഓരോ വാര്‍ഡില്‍ നിന്നും പത്ത്  വനിതകളെ വീതം നേരത്തേ തിരഞ്ഞെടുത്ത് പരിശീലനം നല്‍കിയിരുന്നു. ഇവര്‍ക്ക് വിത്തും തൈകളും സൗജന്യമായി നല്‍കി. വനിതാ കൃഷിക്ക് പുറമെ വാര്‍ഡുകളില്‍ ജൈവ രീതിയില്‍ കൂട്ടുകൃഷിയും നടത്തും. വില്‍പനക്കായി വിപണനകേന്ദ്രവും ഒരുക്കും.