ഗുരുവായൂര്‍: സായ് സഞ്ജീവനി ട്രസ്റ്റിന്റെ 16-ാം വാര്‍ഷികത്തോടനുബന്ധിച്ച് വിപുലമായ ജീവകാരുണ്യപ്രവര്‍ത്തനങ്ങള്‍ നടത്തുമെന്ന് ട്രസ്റ്റ് ചെയര്‍മാന്‍ എ. ഹരിനാരായണന്‍ വാര്‍ത്താസമ്മേളനത്തില്‍ അറിയിച്ചു. ഒക്‌ടോബര്‍ എട്ടിന് പാലക്കാട് അഹല്യ ഫൗണ്ടേഷന്റെ സഹകരണത്തോടെ നേത്രപരിശോധനയും തിമിരശസ്ത്രക്രിയാ ക്യാംപും നടത്തും. ഡോക്ടര്‍മാര്‍ നിര്‍ദേശിക്കുന്ന 100 പേര്‍ക്കു സൗജന്യമായി കണ്ണടകള്‍ വിതരണം ചെയ്യും.
ഒക്‌ടോബര്‍ ഒന്‍പതിനു ജോയ് ആലുക്കാസ് ഫൗണ്ടേഷന്‍, അമല മെഡിക്കല്‍ കോളജ്, അഹല്യ തൃശൂര്‍, മേഴ്‌സി കോളജ് ഗുരുവായൂര്‍ എന്നിവരുടെ സഹകരണത്തോടെ മെഗാ മെഡിക്കല്‍ ക്യാംപും മരുന്നുവിതരണവും മേഴ്‌സി കോളജില്‍ നടക്കും. ജോയ് ആലുക്കാസ് ഫൗണ്ടേഷന്‍ മൂന്നു ലക്ഷം രൂപയുടെ ചികിത്സാ ധനസഹായം നല്‍കും. ഒക്‌ടോബര്‍ 10നു ആയുര്‍വേദ സെമിനാറും മെഡിക്കല്‍ ക്യാംപും മരുന്നുവിതരണവും അഹല്യ ആയുര്‍വേദ മെഡിക്കല്‍ കോളജിന്റെ സഹകരണത്തോടെ സായി മന്ദിരത്തില്‍ നടക്കും. ബി.പി.എല്‍ കാര്‍ഡുള്ളവര്‍ക്കു കിടത്തിചികിത്സ ഉള്‍പ്പെടെ സൗജന്യമായി ലഭ്യമാക്കും. പത്രസമ്മേളനത്തില്‍ ജോയ് ആലുക്കാസ് ഫൗണ്ടേഷന്‍ ചീഫ് കോഡിനേറ്റര്‍ പി.പി ജോസ്, സി.ജി.എം ജോര്‍ജ്, വിനോദ് സി.ടി പങ്കെടുത്തു.