കണ്ണൂര്‍: പുതിയതെരുവില്‍ മത്സ്യലോറി നിയന്ത്രണംവിട്ട് റസ്റ്റോറന്റിലേക്കു പാഞ്ഞുകയറി ഒരാള്‍ക്കു പരുക്കേറ്റു. റസ്റ്റോറന്റ് ഭാഗികമായി തകര്‍ന്നു. ഇന്നലെ പുലര്‍ച്ചെ 3.30ഓടെയാണ് കോഴിക്കോട് നിന്നു മംഗളൂരുവിലേക്കു പോവുകയായിരുന്ന മത്സ്യലോറി വൈദ്യുത തൂണിലിടിച്ച് നിയന്ത്രണംവിട്ട് പുതിയതെരു ജങ്ഷനിലെ ഹമീദിന്റെ ഉടമസ്ഥതയിലുള്ള പാലസ് റസ്‌റ്റോറന്റിലേക്കു പാഞ്ഞുകയറിയത്.
റസ്‌റ്റോറന്റില്‍ കിടന്നുറങ്ങുകയായിരുന്ന വളപട്ടണം മുച്ചിലോട്ട് കാവിനു സമീപത്തെ പി.കെ ഹൗസില്‍ കാത്തിമിനാണ്(76) പരുക്കേറ്റത്. ഇയാളെ ജില്ലാ ആശുപത്രിയില്‍ പ്രവേശിപ്പിച്ചു. ഉടമയുടെ ബന്ധുവാണു കാത്തിം. അപകടത്തെ തുടര്‍ന്നു പുതിയതെരുവില്‍ ഏറെനേരം ഗതാഗതം തടസപ്പെട്ടു. വളപട്ടണം പൊലിസ് എത്തിയാണു ഗതാഗതം പുനഃസ്ഥാപിച്ചത്. ലോറിയും ഡ്രൈവറെയും പൊലിസ് കസ്റ്റഡിയിലെടുത്തു.