നോയിഡ: അതിര്‍ത്തിയിലെ സര്‍ജിക്കല്‍ സ്‌ട്രൈക്കില്‍ വാക്ക് കടുപ്പിച്ച് കോണ്‍ഗ്രസ് ഉപാധ്യക്ഷന്‍ രാഹുല്‍ ഗാന്ധി. സൈനികരുടെ രക്തത്തിനു പിന്നില്‍ മോദി കളിക്കുകയാണെന്ന് രാഹുല്‍ ഗാന്ധി പറഞ്ഞു.

സര്‍ജിക്കല്‍ സ്‌ട്രൈക്ക് നടത്തിയ നമ്മുടെ ജവാന്മാര്‍ അവരുടെ രക്തം നല്‍കി. അവരുടെ രക്തത്തിനു പിന്നില്‍ മോദി കളിക്കുകയാണ്. അവരുടെ രക്തം വില്‍ക്കുകയാണെന്നും രാഹുല്‍ വിമര്‍ശിച്ചു.

യു.പിയില്‍ തെരഞ്ഞെടുപ്പിനു മുന്നോടിയായി നടത്തുന്ന കിസാന്‍ യാത്രയില്‍ സംസാരിക്കുകയായിരുന്നു അദ്ദേഹം.

സര്‍ജിക്കല്‍ സ്‌ട്രൈക്ക് നടത്തിയ സൈനിക നീക്കത്തെ പിന്തുണച്ച് കൊണ്ട് നേരത്തെ രാഹുല്‍ ഗാന്ധി രംഗത്തുണ്ടായിരുന്നു. ആദ്യമായി മോദി പ്രധാനമന്ത്രിയായി പ്രവര്‍ത്തിച്ചിരിക്കുന്നുവെന്നാണ് രാഹുല്‍ പറഞ്ഞത്. എന്നാല്‍ കള്ളപ്പണ വിഷയം ഉന്നയിക്കുന്നതിനിടെ മോദിയെ കടന്നാക്രമിക്കുകയായിരുന്നു.

മോദി വാഗ്ദാനം ചെയ്ത 15 ലക്ഷം എവിടെയെന്ന് രാഹുല്‍ ചോദിച്ചു. 'നിങ്ങളുടെ വാഗ്ദാനങ്ങള്‍ക്ക് എന്തു സംഭവിച്ചു? നിങ്ങള്‍ വാഗ്ദാനം ചെയ്ത ബാങ്ക് അക്കൗണ്ട് എല്ലാവര്‍ക്കുമായി, പക്ഷെ, അതില്‍ പണമില്ല. അദ്ദേഹത്തിന്റെ എല്ലാ വാഗ്ദാനങ്ങളും വ്യാജമാണ'്- രാഹുല്‍ പറഞ്ഞു.