കൊട്ടാരക്കര: കുടവട്ടൂരില്‍ സമീപത്തുള്ള ക്വാറിയില്‍ നിന്ന് പാറക്കഷ്ണം തെറിച്ചുവീണ് വീടിന്റെ മേല്‍ക്കൂര തകര്‍ന്നു.
മുറ്റത്ത് നിന്ന അമ്മയും കുഞ്ഞും ഓടിമാറിയതിനാല്‍ രക്ഷപ്പെട്ടു. ഇന്നലെ രാവിലെ പത്തോടെയായിരുന്നു സംഭവം. വാട്ടര്‍ അതോറിറ്റി ജീവനക്കാരനായ കുടവട്ടൂര്‍ പഴനിലക്കല്‍ വീട്ടില്‍ ബിജുവിന്റെ വീടിന്റെ മേല്‍ക്കൂരയാണ് തകര്‍ന്നത്. കല്ലുവീഴുന്ന ശബ്ദംകേട്ട് അമ്മ രണ്ട് വയസുള്ള കുഞ്ഞിനെയും അകത്തേക്ക് ഓടിയതാണ് രക്ഷയായത്.
വീടിന് നൂറുമീറ്റര്‍ അകലെ പ്രവര്‍ത്തിക്കുന്ന ചാവരുക്വാറിയില്‍ നിന്നാണ് പാറക്കഷ്ണം തെറിച്ചുവീണത്. മുന്‍പും സമീപത്തെ പുരയിടത്തിലും മറ്റും പാറക്കഷ്ണങ്ങള്‍ തെറിച്ചു വീണിരുന്നു. അന്ന് പരാതി നല്‍കാനൊരുങ്ങിയപ്പോള്‍ ഇനി ഉഗ്രശേഷിയില്‍ പാറപൊട്ടിക്കില്ലന്ന് പറഞ്ഞ് ക്വാറിയുടമ പിന്തിരിപ്പിക്കുകയായിരുന്നു.