ലഖ്‌നൗ: യുപിയില്‍ പ്രൈമറി സ്‌കൂള്‍ അധ്യാപകനെയും, ഭാര്യയെയും രണ്ട് കുട്ടികളെയും വെടിവെച്ചുകൊന്നു. അമേഠിയില്‍ വ്യാഴാഴ്ച്ച വൈക്കുന്നേരത്തോടെയായിരുന്നു സംഭവം. പന്‍ഹോണ പ്രൈമറി സ്‌കൂളിലെ അധ്യാപകനായ സുനില്‍ കുമാര്‍ (35), ഭാര്യ (33) ആറും, ഒന്നും വയസുള്ള രണ്ട് പെണ്‍മക്കള്‍ എന്നിവരെയാണ് മൃഗീയമായി കൊന്നത്. 

താമസ സ്ഥലത്തേക്ക് അതിക്രമിച്ച് കയറിയാണ് അക്രമികള്‍ വെടിയുതിര്‍ത്തത്. വ്യക്തിവൈരാഗ്യമാണ് കൊലക്ക് കാരണമെന്നാണ് പ്രാഥമിക വിലയിരുത്തല്‍. റായ്ബറേലിയിലെ ഉച്ചാഹറില്‍ താമസിച്ചിരുന്ന സുനില്‍കുമാറും കുടുംബവും അടുത്തിടെയാണ് അമേഠിയിലെ സിംഗ്പൂര്‍ ബ്ലോക്കിലേക്ക് മാറിയതെന്ന് പൊലിസ് പറഞ്ഞു. 

സുനില്‍ കുമാറിന്റെയും, ഭാര്യയുടെയും മൃതദേഹം വീട്ടിനകത്തെ വാട്ടര്‍ പൈപ്പിന് സമീപത്തുനിന്നാണ് കണ്ടെത്തിയത്. രണ്ട് കുട്ടികളുടെയും മൃതദേഹം മറ്റൊരു മുറിക്കുള്ളില്‍ നിന്നും കണ്ടെത്തുകയായിരുന്നു. സംഭവത്തില്‍ പ്രത്യേക സംഘത്തെ രൂപീകരിച്ച് അന്വേഷണം പുരോഗമിക്കുകയാണെന്ന് പൊലിസ് അറിയിച്ചു. 

Four people including a teacher his wife and children were shot dead in UP