പയ്യന്നൂര്‍: പൊലിസ് ഉദ്യോഗസ്ഥന്‍ ഓടിച്ച ജീപ്പ് വൈദ്യുതി പോസ്റ്റിലിടിച്ച് കാസര്‍കോട് ടൗണ്‍ ട്രാഫിക് സ്റ്റേഷന്‍ അഡീഷണല്‍ എസ്.ഐ മാവിച്ചേരിയിലെ എ ബാബക്ക് പരുക്ക്. ഇയാളെ പയ്യന്നൂരിലെ സ്വകാര്യ ആശുപത്രിയില്‍ പ്രവേശിപ്പിച്ചു. ഇന്നലെ ഉച്ചക്ക് ഒരുമണിയോടെയാണ് പുതിയ ബസ് സ്റ്റാന്‍ഡില്‍ നിന്നു മാവിച്ചേരിയിലേക്കുള്ള റോഡരികിലെ ഹൈടെന്‍ഷന്‍ പോസ്റ്റില്‍ ബാബ ഓടിച്ച ജീപ്പ് ഇടിച്ചത്. ഇടിയുടെ ആഘാതത്തില്‍ പോസ്റ്റ് പൊട്ടിവീണു. സംഭവസമയം ഇവിടെ ആളുകള്‍ ഇല്ലാത്തതിനാല്‍ വന്‍ ദുരന്തം ഒഴിവായി. ഓടിയെത്തിയ നാട്ടുകാര്‍ ഇരു ഭാഗത്തുനിന്നുമുള്ള ഗതാഗതം തടഞ്ഞു. വിവരമറിഞ്ഞ് പൊലിസും വൈദ്യുതി ജീവനക്കാരും സ്ഥലത്തെത്തി. പൊലിസ് ഉദ്യോഗസ്ഥന്‍ മദ്യപിച്ച് വാഹനം ഓടിച്ചതാണ് അപകടത്തിനു കാരണമായതെന്ന് നാട്ടുകാര്‍ ആരോപിച്ചു.