പുത്തന്‍ചിറ: വെള്ളാങ്കല്ലൂര്‍ ഗ്രാമപഞ്ചായത്തിലെ കോണത്ത്കുന്നില്‍ നിന്ന് അനധികൃതമായി സൂക്ഷിച്ച പാചക വാതകം നിറച്ച സിലിണ്ടറുകള്‍ പിടികൂടി. ലൈസന്‍സോ മറ്റ് രേഖകളോ ഇല്ലാതെ നടത്തിയിരുന്ന ഗോഡൗണില്‍ നിന്നാണ് പാചകചവാതകം നിറച്ച സിലിണ്ടറുകള്‍  പിടികൂടിയത്. വാതകം നിറച്ച 50 സിലിണ്ടറുകളും 45 കാലി സിലിണ്ടറുകളും ഇരിങ്ങാലക്കുട പൊലിസ് പിടിച്ചെടുത്തു. സംഭവത്തില്‍ വെള്ളാങ്കല്ലൂര്‍ കുളിയാടന്‍ വര്‍ഗീസിനെ എസ്.ഐ എം.കെ സുരേഷ്‌കുമാറും സംഘവും അറസ്റ്റ് ചെയ്തു. അപകടകരമായ സാഹചര്യത്തില്‍ സുരക്ഷാ മുന്‍കരുതലുകളില്ലാതെയാണ് ഗോഡൗണ്‍ പ്രവര്‍ത്തിച്ചിരുന്നതെന്ന് പൊലിസ് പറഞ്ഞു. സ്ഥാപനത്തിന് മുന്നില്‍ സ്റ്റൗ റിപ്പയറിംഗ് എന്ന ബോര്‍ഡ് സ്ഥാപിച്ചാണ് സിലിണ്ടറുകള്‍ സൂക്ഷിക്കുകയും വിതരണം നടത്തുകയും ചെയ്തിരുന്നത്. എ.എസ്.പി മെറിന്‍ ജോസഫിന് ലഭിച്ച രഹസ്യവിവരത്തിന്റെ അടിസ്ഥാനത്തിലാണ് പൊലിസ് റെയ്ഡ് നടത്തിയത്. പ്രതിയെ കോടതിയില്‍ ഹാജരാക്കി റിമാന്റ് ചെയ്തു.