അരീക്കോട്: കാഴ്ചയില്ലാത്തവര്‍ക്ക് വെള്ളവും വെളിച്ചവുമെത്തിക്കാന്‍ 'ഇന്‍സൈറ്റ് ' വാട്ട്‌സ്ആപ്പ് കൂട്ടായ്മ രംഗത്ത്. കീഴുപറമ്പ് പഞ്ചായത്തിലെ പഴമ്പറമ്പില്‍ പ്രവര്‍ത്തിക്കുന്ന കാഴ്ചയില്ലാത്തവരുടെ അഗതി മന്ദിരത്തില്‍ വെള്ളത്തിനും വെളിച്ചത്തിനും ആവശ്യമായ സാമ്പത്തിക സഹായമാണ് ഇന്‍സൈറ്റ് വാട്ട്‌സ്ആപ്പ് കൂട്ടായ്മ ഏറ്റെടുത്തത്. ഇന്നലെ രാവിലെ അഗതിമന്ദിരത്തിലെത്തിയ ഗ്രൂപ്പ് അംഗങ്ങള്‍ പാടിയും പറഞ്ഞും കാഴ്ചയില്ലാത്തവരായ മുപ്പതോളം അന്തേവാസികള്‍ക്ക് സാന്ത്വനമായി കൂട്ടിരുന്നു. തുടര്‍ന്ന് നടന്ന ചര്‍ച്ചക്ക് കീഴുപറമ്പ് പഞ്ചായത്ത് മുന്‍ പ്രസിഡന്റ് കെ.സി.എ ശുക്കൂര്‍ നേതൃത്വം നല്‍കി. അഗതിമന്ദിരത്തിന്റെ പ്രചാരണവും സാമ്പത്തിക സ്രോതസും ലക്ഷ്യമിട്ട് സംസ്ഥാനത്തിന്റെ വിവിധ ഭാഗങ്ങളില്‍ നിന്നുള്ള കലാകാരന്മാരെ പങ്കെടുപ്പിച്ച് തെരുവുകളില്‍ സഞ്ചരിക്കുന്ന ഇശല്‍ വിരുന്ന്, ഫ്‌ലാഷ് മോബ്, തെരുവ് നാടകം തുടങ്ങിയ പരിപാടികള്‍ ഇന്‍സൈറ്റിന് കീഴില്‍ സംഘടിപ്പിക്കും. 

കുടിവെള്ളത്തിനും വൈദ്യുതിക്കും ആവശ്യമായ തുക ഇന്‍സൈറ്റ് പ്രവര്‍ത്തകര്‍ സ്ഥാപന അധികൃതരെ ഏല്‍പ്പിച്ചു. ഹാമിദലി കുനിയില്‍, അബ്ദുല്‍ അസീസ് മാസ്റ്റര്‍, കെ.പി വേലായുധന്‍, ബാലു ഇടുക്കി, ഇസ്മാഈല്‍ ചാലില്‍, ശഫീഖ് പെരിന്തല്‍മണ്ണ, എം.ടി ഹിഷാം വെട്ടത്തൂര്‍, എന്‍.സി ഷെരീഫ് കിഴിശ്ശേരി, ശഫീഖ് ഫറോക്ക്, ജ്യോതി വിളയില്‍ സംബന്ധിച്ചു.