നേമം: വെളളായണി ജങ്ഷന്‍-നേമം ശിവക്ഷേത്രം റോഡില്‍ കഴിഞ്ഞ ദിവസം രാത്രിയില്‍ സാമൂഹിക വിരുദ്ധരുടെ അഴിഞ്ഞാട്ടം. ശിവക്ഷേത്രത്തിനു സമീപത്തെ വീടുകളില്‍ പാര്‍ക്ക് ചെയ്തിരുന്ന ഇരുചക്ര വാഹനങ്ങളിലെ പെട്രോള്‍ തുറന്നു വിട്ട സംഘം ബാറ്ററികള്‍ മോഷ്ടിച്ചു. പൊലിസ് വന്നാല്‍ മാര്‍ഗ്ഗതടസം ഉണ്ടാക്കുന്നതിനായി റോഡിനു കുറുകെ സിമന്റ് കല്ലുകളും പഴയ തടി സാമഗ്രികളും നിരത്തി റോഡ് അടച്ച ശേഷമായിരുന്നു സംഘം വിലസിയത്.
ക്ഷേത്രത്തിനു സമീപത്ത് താമസിക്കുന്ന വിനോദിന്റെ ബൈക്കിന്റെ ബാറ്ററിയും പ്ലംബിംഗിനുപയോഗിക്കുന്ന ടൂള്‍ കിറ്റും നഷ്ടമായിട്ടുണ്ട്. ക്ഷേത്രത്തിനു സമീപത്തുളള ഒരു വീട്ടിലെ 25 ഓളം വാഴകള്‍ പിഴുത് നശിപ്പിച്ചിട്ടുണ്ട്. ദിവസങ്ങള്‍ക്ക് മുന്‍പ് വെളളായണി മുക്ക് കേന്ദ്രീകരിച്ച് ഇരു വിഭാഗങ്ങള്‍ തമ്മിലുണ്ടായ സംഘര്‍ഷത്തില്‍ ഒരു യുവാവ് മരണപ്പെട്ടിരുന്നു. ഈ കേസിലെ മുഴുവന്‍ പ്രതികളെയും കഴിഞ്ഞ ദിവസം പിടികൂടിയിരുന്നു. ഇന്നലെ നടന്ന സംഭവത്തിന് ഈ അറസ്റ്റുമായി ബന്ധമുണ്ടോയെന്ന് പൊലിസ് അന്വേഷിക്കുന്നുണ്ട്.