സുല്‍ത്താന്‍ ബത്തേരി: സെന്റ് മേരീസ് കോളജ് പരിസരത്തുണ്ടായ ഡിവൈ.എഫ്.ഐ-ആര്‍.എസ്.എസ് സംഘര്‍ഷത്തില്‍ അഞ്ചു പേര്‍ക്ക് പരുക്ക്. തിങ്കളാഴ്ച വൈകിട്ട് 7.30നാണ് സംഭവം. ആര്‍.എസ്.എസ് സമ്മേളനവുമായി ബന്ധപ്പെട്ട് സെന്റ് മേരീസ് കോളജ് ഗ്രൗണ്ടില്‍ ട്രാക്ക് വരയ്ക്കാന്‍ എത്തിയതായിരുന്നു ആര്‍.എസ്.എസ് പ്രവര്‍ത്തകര്‍. കോളജ് യൂനിയന്‍ തെരഞ്ഞെടുപ്പുമായി ബന്ധപ്പെട്ട് എസ്.എഫ്.ഐ പ്രവര്‍ത്തകരും സമീപത്തുണ്ടായിരുന്നു. ഇരു വിഭാഗങ്ങളുടെയും വാക്കേറ്റത്തെത്തുടര്‍ന്നാണ് ഡി.വൈ.എഫ്.ഐ പ്രവര്‍ത്തകര്‍ എത്തിയത്. ഇതോടെ വാക്കേറ്റം സംഘട്ടനത്തില്‍ കലാശിക്കുകയായിരുന്നു.
മൂന്നു ആര്‍.എസ്.എസ് പ്രവര്‍ത്തകര്‍ക്കും രണ്ട് ഡി.വൈ.എഫ്.ഐ പ്രവര്‍ത്തകര്‍ക്കുമാണ് പരുക്കേറ്റത്. ആര്‍.എസ്.എസ് പ്രവര്‍ത്തകരായ രജില്‍, സുബീഷ്, സുധീഷ് എന്നിവര്‍ക്കും ഡി.വൈ.എഫ്.ഐ പ്രവര്‍ത്തകരായ ഹരീഷ് കൃഷ്ണന്‍, മിര്‍ഷാദ് എന്നിവര്‍ക്കുമാണ് പരുക്കേറ്റത്. ഗുരുതരമായി പരുക്കേറ്റ ഡി.വൈ.എഫ്.ഐ പ്രവര്‍ത്തകന്‍ മിര്‍ഷാദിനെ കോഴിക്കോട് മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. സ്ഥലത്ത് പൊലിസ് ക്യാംപ് ചെയ്യുന്നുണ്ട്.