കുമളി: ഓട്ടത്തിനിടയില്‍ സ്‌കോര്‍പിയോ വാന്‍ കത്തിനശിച്ചു. വാഹനത്തിലുണ്ടായിരുന്ന പത്തംഗ കുടുംബം അത്ഭുതകരമായി രക്ഷപെട്ടു. എറണാകുളം വൈറ്റില കാട്ടാശേരില്‍ ടെഡിയും കുടുംബവും സഞ്ചരിച്ചിരുന്ന വാഹനമാണ് കത്തിനശിച്ചത്. ഇന്നലെ ഉച്ചകഴിഞ്ഞ് 1.45-ഓടെ കുമളിക്കു സമീപം 66-ാംമൈലിലാണ് സംഭവം.
തേക്കടി സന്ദര്‍ശനത്തിനുശേഷം മടങ്ങുകയായിരുന്നു ഇവര്‍. കുമളിയില്‍നിന്നും വാഹനത്തില്‍ ഡീസല്‍ നിറച്ചശേഷമാണ് യാത്ര പുറപ്പെട്ടത്. ഡിസല്‍നിറച്ച് മൂന്നുകിലോമീറ്ററോളം പിന്നിട്ടപ്പോഴാണ് വാഹനത്തിനു തീപിടിച്ചത്. വാഹനത്തില്‍നിന്നും കരിയുന്ന ഗന്ധം അനുഭവപ്പെടുകയും തുടര്‍ന്ന് ബോണറ്റില്‍നിന്നും തീ പടരുകയുമായിരുന്നു. വാഹനം പെട്ടന്നുനിര്‍ത്തി എല്ലാവരും ചാടിയിറങ്ങിയപ്പോഴേക്കും വാഹനം പൂര്‍ണമായി തീ ആളിപ്പടര്‍ന്നു. പൊലിസെത്തി നാട്ടുകാരുടെ സഹായത്തോടെ തീയണയ്ക്കാന്‍ ശ്രമിച്ചെങ്കിലും ആദ്യം സാധിച്ചില്ല. പിന്നീട് ലോറിയില്‍ വെള്ളമെത്തിച്ച് തീയണയ്ക്കുകയായിരുന്നു. വാഹനം പൂര്‍ണമായി കത്തിനശിച്ചു. ഒരുമണിക്കൂറോളം ദേശീയപാതയില്‍ ഗതാഗതം തടസപ്പെട്ടു. ടെഡിയും കുടുംബവും പിന്നീട് മറ്റൊരു വാഹനത്തിലാണ് മടങ്ങിയത്.