കാക്കനാട്:  കാക്കനാട് ചില്‍ഡ്രന്‍സ് ഹോമിലെ അന്തേവാസികളായ പെണ്‍കുട്ടികള്‍ക്ക് തല്‍ക്കാലം വീട്ടില്‍ പോയി താമസിക്കാന്‍ ചൈല്‍ഡ് വെല്‍ഫെയര്‍ കമ്മിറ്റിയുടെ അനുവാദം.
പത്ത് ദിവസം വീട്ടില്‍ പോയി രക്ഷിതാക്കള്‍ക്കൊപ്പം താമസിക്കാനാണ് വെല്‍ഫെയര്‍ കമ്മിറ്റിയുടെ നിര്‍ദേശം. അടിസ്ഥാന സൗകര്യങ്ങളില്ലാത്തതിലും കെയര്‍ടേക്കര്‍മാരുടെ പീഡനത്തിലും പ്രതിഷേധിച്ച് ചില്‍ഡ്രന്‍സ് ഹോമിലെ 20 പെണ്‍കുട്ടികള്‍ വ്യാഴാഴ്ച രാവിലെ കെട്ടിടത്തിന് മുകളില്‍ കയറി സമര ഭീഷണി മുഴക്കിയ സാഹചര്യത്തിലാണു ചൈല്‍ഡ് വെല്‍ഫെയര്‍ കമ്മിറ്റി യോഗം കൂടി കുട്ടികളെ അവരുടെ രക്ഷിതാക്കള്‍ക്കൊപ്പം തല്‍കാലം പറഞ്ഞുവിടാന്‍ തീരുമാനിച്ചത്.
32 പെണ്‍കുട്ടികള്‍ തമാസിക്കുന്ന  ഗേള്‍സ് ഹോമില്‍ നിന്ന് എട്ട് കുട്ടികളുടെ രക്ഷിതാക്കളെ ഇന്നലെ വിളിച്ച് വരുത്തി നിര്‍ബന്ധിച്ച് പറഞ്ഞു വിടുകയായിരുന്നു.
അഞ്ച് കുട്ടികളെ ഇന്ന് രക്ഷിതാക്കള്‍ക്കൊപ്പം വിടുമെന്ന് ചൈല്‍ഡ് വെല്‍ഫെയര്‍ കമ്മിറ്റി ചെയര്‍പേഴ്‌സണ്‍ പത്മജ സി നായര്‍ അറിയിച്ചു. വീട്ടിലേക്ക് പറഞ്ഞു വിട്ടവരില്‍ മൂന്ന് കുട്ടികള്‍ പത്തനംതിട്ട, ആലപ്പുഴ ജില്ലകളില്‍ നിന്നുള്ളവരാണ്. അതെസമയം കുട്ടികളെ വീട്ടിലേക്ക്  കൂട്ടിക്കൊണ്ട് പോകാന്‍ രക്ഷിതാക്കള്‍ പലരും മടികാണിക്കുന്നത് മൂലം എല്ലാവരെയും പറഞ്ഞു  വിടാന്‍ കഴിയാത്തവസ്ഥയാണ്.
കെട്ടിടത്തിനുമുകളില്‍ കയറി സമര ഭീഷണി മുഴക്കിയ കുട്ടികളെ തെരഞ്ഞു  പിടിച്ച് വീട്ടില്‍ പറഞ്ഞു വിടുകയാണെന്നും അക്ഷേപം ഉയര്‍ന്നിട്ടുണ്ട്. ജില്ലാ സാമൂഹിക ക്ഷേമ വകുപ്പിന് കീഴില്‍ പ്രവര്‍ത്തിക്കുന്ന ചില്‍ഡ്രന്‍സ് ഹോമില്‍ കുട്ടികള്‍ ശാരീരിക, മാനസിക ചൂഷണത്തിന് വിധേയമാകുന്നതായി അന്തേവാസികളില്‍ നിന്ന് തന്നെ പാരാതി ഉയര്‍ന്നിട്ടും പരിഹരിക്കാന്‍ നടപടിയില്ല. രക്ഷിതാക്കള്‍ മാനസിക രോഗികളായ കുടുബത്തിലെയും വീടുകളില്‍ ലൈംഗീക ചൂഷണത്തിന് ഇരായായും കൊടും പീഡനത്തിനിരയായി ജീവന് ഭീഷണിയുള്ള കുട്ടികളെ ഉള്‍പ്പെടെയുള്ളവരാണ്  ചില്‍ഡ്രന്‍സ് ഹോമിലെ അന്തേവാസികള്‍.
അരക്ഷതാവസ്ഥയില്‍ നിന്ന് ചില്‍ഡ്രന്‍സ് ഹോമിലെത്തിയ കുട്ടികളെ അതേ അവസ്ഥയിലേക്ക് തന്നെയാണ് താല്‍കാലികമായാണെങ്കിലും പറഞ്ഞുവിടുന്നത്. വീട്ടിലേക്ക് പറഞ്ഞു വിടുന്ന കുട്ടികളുടെ സുരക്ഷ സംബന്ധിച്ച് ചോദ്യത്തിന് അവരുടെ രക്ഷിതാക്കള്‍ക്കൊപ്പമാണ് വിടുന്നതെന്നായിരുന്നു അധികൃതരുടെ വിശദീകരണം. പത്ത് ദിവസം രക്ഷിതാക്കള്‍ക്കൊപ്പം താമസിക്കുന്ന കുട്ടികളുടെ മാനസികാവസ്ഥ മെച്ചപ്പെടുമെന്നാണ് അധികൃതരുടെ കണക്ക് കൂട്ടല്‍.
മാനസിക,ശാരീരിക ഉല്ലാസത്തിന് യാതൊന്നുമില്ലാത്ത  അന്തേവാസികള്‍ക്ക് ചില്‍ഡ്രന്‍സ് ഹോം അക്ഷരാര്‍ഥത്തില്‍ കാരാഗ്രഹമാണ്. വായിക്കാനോ ടീവി കാണാനോ ചില്‍ഡ്രന്‍സ് ഹോമില്‍ സൗകര്യമില്ല.
പീഡനത്തിന് ഇരയായവരും വീട്ടുകാര്‍  ഉപേക്ഷിക്കപ്പെട്ടവരുമായ കുട്ടികള്‍ ഗേള്‍സ് ഹോമില്‍ വീര്‍പ്പ് മുട്ടുന്ന അവസ്ഥയിലാണ്. കഴിഞ്ഞ ദിവസം ഇവിടെ നിന്നും നാല് പെണ്‍കുട്ടികള്‍ ഒളിച്ചോടി പോയതിലെ കാരണങ്ങള്‍ ആരായാനും  അധികാരികള്‍ തയ്യാറായിട്ടില്ല.