പൂച്ചാക്കല്‍ : ഭൂഗര്‍ഭ കേബിള്‍ മുറിഞ്ഞതിനെ തുടര്‍ന്ന് പാണാവള്ളി, പെരുമ്പളം, അരൂക്കുറ്റി മേഖലകളിലെ ബി.എസ.്എന്‍.എല്‍ നെറ്റ് വര്‍ക്ക് സംവിധാനം ഇന്നലെ പകല്‍ മുഴുവന്‍ തകരാറിലായി. കെഎസ്ഇബി നേതൃത്വത്തിലുള്ള തൊഴിലാളികള്‍ കഴിഞ്ഞ രാത്രി അരൂക്കുറ്റി ഭാഗത്ത് റോഡിനടിയില്‍ കേബിള്‍ സ്ഥാപിക്കുന്നതിനു കുഴി എടുത്തിരുന്നു. അതിനിടെയാണ് ബിഎസ്എന്‍എല്ലിന്റെ ഭൂഗര്‍ഭ കേബിള്‍ മുറിഞ്ഞതെന്നു ബിഎസ്എന്‍എല്‍ അധികൃതര്‍ പറഞ്ഞു.
മൂന്നു പഞ്ചായത്തുകളിലും ഇന്നലെ രാവിലെ മുതല്‍ ബ്രോഡ്ബ്രാന്‍ഡ്, ത്രിജി കണക്ഷനുകള്‍ ലഭിച്ചില്ല. ഇതുമൂലം വിവിധ സ്ഥാപനങ്ങളുടേത് ഉള്‍പ്പെടെയുള്ള പ്രവര്‍ത്തനങ്ങള്‍ തടസപ്പെട്ടു. ബിഎസ്എന്‍എല്‍ അധികൃതരുടെ നേതൃത്വത്തിലുള്ള തൊഴിലാളികള്‍ മുറിഞ്ഞ കേബിള്‍ കൂട്ടിയിണക്കി ഇന്നലെ വൈകിട്ടോടെയാണ് കണക്ഷന്‍ പുനസ്ഥാപിച്ചത്.