നിലമ്പൂര്‍: ബ്ലോക്ക് പഞ്ചായത്ത് പരിധിയില്‍ വരുന്ന മുഴുവന്‍ പഞ്ചായത്തുകളിലും സമ്പൂര്‍ണ ശൗചാലയം പദ്ധതി പ്രഖ്യാപനം നടത്തി. ബ്ലോക്ക് പഞ്ചായത്ത് ഹാളില്‍ പി.വി അന്‍വര്‍ എം.എല്‍.എ പ്രഖ്യാപനം നടത്തിയത്. പൊതു സ്ഥലങ്ങളില്‍ പെയ്ഡ് ടോയ്‌ലറ്റ് പദ്ധതിക്ക് എം.എല്‍.എ ഫണ്ടില്‍ നിന്നും പഞ്ചായത്ത് പ്രസിഡന്റുമാര്‍ ആവശ്യപ്പെട്ടാല്‍ പത്തുലക്ഷം രൂപവീതം നല്‍കുമെന്നും അദ്ദേഹം പറഞ്ഞു.
ബ്ലോക്ക് പഞ്ചായത്ത് പ്രസിഡന്റ് പി.പി സുഗതന്‍ അധ്യക്ഷനായി. ബ്ലോക്കില്‍ ആറു പഞ്ചായത്തുകളിലായി 1285 കക്കൂസുകള്‍ പുതിയതായി നിര്‍മിച്ചു. ഇതില്‍ ഏറ്റവും കൂടുതല്‍ വഴിക്കടവ് പഞ്ചായത്തിലാണ്. 444 ശൗചാലയങ്ങളാണ് ഇവിടെ നിര്‍മിച്ചത്. ചുങ്കത്തറ 204, പോത്തുകല്ല് 188, ചാലിയാര്‍ 186, എടക്കര 163, മൂത്തേടം 100 എന്നിങ്ങനെ മറ്റു പഞ്ചായത്തുകളിലും നിര്‍മിച്ചു.