തേഞ്ഞിപ്പലം: മലപ്പുറം ജില്ലാ അത് ലറ്റിക്‌സ് അസോസിയേഷന്റെ നേതൃത്വത്തില്‍ കാലിക്കറ്റ് യൂനിവേഴ്‌സിറ്റി സ്റ്റേഡിയത്തില്‍ സമാപിച്ച ജില്ലാ അത്‌ലറ്റിക് മീറ്റില്‍ 1066.5 പോയിന്റുകള്‍ നേടി ഐഡിയല്‍ കടകശ്ശേരി ചാമ്പ്യന്‍മാരായി. 613 പോയിന്റ് നേടിയ ദൈര സ്‌പോര്‍ട്‌സ് അക്കാദമി തവനൂര്‍ രണ്ടാം സ്ഥാനവും 362.5 പോയിന്റ് നേടിയ സി.പി.ഇ കാലിക്കറ്റ് യൂനിവേഴ്‌സിറ്റി മൂന്നാം സ്ഥാനവും കരസ്ഥമാക്കി. ഒമ്പതാം തവണയാണ് ഐഡിയല്‍ ജില്ലാ അത് ലറ്റിക് മീറ്റില്‍ ചാമ്പ്യന്‍ പട്ടം കരസ്ഥമാക്കുന്നത്.

തുടര്‍ച്ചയായി അഞ്ചാം തവണ ചാമ്പ്യന്‍മാരായ ഐഡിയലിന് 2012ല്‍ മാത്രമാണു ചാമ്പ്യന്‍ പട്ടം നഷ്ടമായത്. അണ്ടര്‍ 14, 16, 18, 20 ആണ്‍, പെണ്‍ തുടങ്ങിയ എല്ലാ വിഭാഗങ്ങളിലുമായി 256 അത്‌ലറ്റുകളാണ് ഐഡിയല്‍ സ്‌കൂളില്‍ നിന്നും പങ്കെടുത്തത്.
പ്രധാന കോച്ച് നദീഷ് ചാക്കോ, ശാഫി അമ്മായത്ത്, തസ്‌നി ശരീഫ്, എന്നിവരാണു ടീമിന്റെ പരിശീലകര്‍. സമാപന ചടങ്ങ് കാലിക്കറ്റ് യൂനിവേഴ്‌സിറ്റി പരീക്ഷാ കണ്‍ട്രോളര്‍ ഡോ. ജോര്‍ജ് കുട്ടി വിജയികള്‍ക്കു ട്രോഫി കള്‍ സമ്മാനിച്ച് ഉദ്ഘാടനം ചെയ്തു. അത്‌ലറ്റിക്‌സ് അസോസിയേഷന്‍ ജില്ലാ പ്രസിഡന്റ് ഡോ. സക്കീര്‍ ഹുസൈന്‍ അധ്യക്ഷനായി. വൈസ് പ്രസിഡന്റ് മജീദ് ഐഡിയല്‍, സെക്രട്ടറി കെ.കെ രവീന്ദ്രന്‍ മാസ്റ്റര്‍, മുഹമ്മദ് കാസിം മാസ്റ്റര്‍, ഹനീഫ മാസ്റ്റര്‍ സംസാരിച്ചു.