കോല്‍ക്കത്ത: ഇന്ത്യന്‍ സൂപ്പര്‍ ലീഗില്‍ മൂന്നു തുടര്‍ തോല്‍വികളുമായി നാണംകെട്ട നിലവിലെ രണ്ടാം സ്ഥാനക്കാരായ എഫ്.സി ഗോവ ഒടുവില്‍ നാലാം മത്സരം സമനിലയിലാക്കി രക്ഷപ്പെട്ടു. കരുത്തരായ അത്‌ലറ്റിക്കോ ഡി കൊല്‍ക്കത്തയെയാണ് അവര്‍ സമനിലയില്‍ തളച്ച് വിലപ്പെട്ട ഒരു പോയിന്റ് സ്വന്തമാക്കിയത്.  ഓരോ ഗോള്‍ വീതം നേടിയാണ് ഇരു ടീമുകളും സമനില പാലിച്ചത്. അത്‌ലറ്റിക്കോയ്ക്കായി ആറാം മിനുട്ടില്‍ സമീഗ് ദൗത്തി ഗോവന്‍ വലയില്‍ പന്തെത്തിച്ചപ്പോള്‍ 77ാം മിനുട്ടില്‍ ലഭിച്ച പെനാല്‍റ്റി ഗോളാക്കി മാറ്റി ജോഫ്രെ ഗോവയ്ക്ക് സമനില സമ്മാനിക്കുകയായിരുന്നു.