കാക്കനാട്: കാക്കനാട്ടെ റവന്യു വിവാദ സ്ഥലം സംബന്ധിച്ചു വില്ലേജ് ഓഫിസര്‍ ബന്ധപ്പെട്ടവര്‍ക്ക് റിപ്പോര്‍ട്ട് നല്‍കി. നഗരസഭക്ക് ബസ് ടെര്‍മിനല്‍ ഉള്‍പ്പെടെയുള്ള വന്‍ പദ്ധതിക്കായി സ്ഥലം ആവശ്യമുണ്ടെന്നും അതിനായി ഈ സ്ഥലം പതിച്ചു നല്‍കണമെന്നും കാണിച്ച് നഗരസഭ ജില്ലാ കലക്ടര്‍ക്കും വകുപ്പ് മന്ത്രിക്കും നിവേദനം നല്‍കിയിരുന്നു.
റവന്യു വകുപ്പിന്റെ ഈ സ്ഥലം നഗരസഭ അവകാശവാദം ഉന്നയിച്ച് നിര്‍മാണ പ്രവര്‍ത്തനത്തിന്റെ ഭാഗമായി വേലി കെട്ടിത്തിരിക്കല്‍ നടത്തിയപ്പോള്‍ റവന്യു വകുപ്പ് ഏറ്റെടുത്ത് ബോര്‍ഡ് സ്ഥാപിക്കുകയായിരുന്നു. ഇതിനെ തുടര്‍ന്നാണ് നഗരസഭ ജില്ലാ കലക്ടര്‍ക്കും വകുപ്പ് മന്ത്രിക്കും അപേക്ഷ സമര്‍പ്പിച്ചത്.
എത്രയും വേഗം റിപ്പോര്‍ട്ട് തയാറാക്കി നല്‍കാന്‍ വകുപ്പ് മന്ത്രി നിര്‍ദേശം നല്‍കിയതിനെ തുടര്‍ന്നാണ് വില്ലേജ് ഓഫിസറായ ഉദയകുമാര്‍ വിശദമായ റിപ്പോര്‍ട്ട് തയാറാക്കി കഴിഞ്ഞ ദിവസം കഴിഞ്ഞ ദിവസം തഹസില്‍ദാര്‍ക്ക് സമര്‍പ്പിച്ചത്.
തഹസില്‍ദാര്‍ ഈ റിപ്പോര്‍ട്ട് ഇന്ന് ജില്ലാ കലക്ടര്‍ക്ക് കൈമാറും. തൃക്കാക്കരയില്‍ ആധുനിക രീതിയിലുള്ള ബസ് ടെര്‍മിനല്‍ ഇല്ലാത്തതിനാല്‍ അത് അനിവാര്യമാന്നെന്നും റിപ്പോര്‍ട്ടില്‍ സൂചനയുണ്ട്.