വടകര: കോഴിക്കോട് റൂറല്‍ എസ്.പി ഓഫിസില്‍ അബദ്ധത്തില്‍ തോക്ക് പൊട്ടി. പുതുപ്പണത്തെ ഓഫിസില്‍ ഇന്നലെ രാവിലെ എട്ടോടെയാണ് സംഭവം. പാറാവ് ഡ്യൂട്ടിക്ക് നില്‍ക്കുന്ന പൊലിസുകാരന്‍ തോക്ക് വൃത്തിയാക്കുന്നതിനിടെ പൊട്ടുകയായിരുന്നു. ആളപായമില്ല. ഓഫിസിലെ തോക്കുകളും മറ്റു സാമഗ്രികളും പരിശോധിക്കുന്നതിനായി എ.ആര്‍ ക്യാംപില്‍ നിന്ന് ഉദ്യോഗസ്ഥര്‍ എത്തുന്നതറിഞ്ഞാണ് ഇവ വൃത്തിയാക്കിയിരുന്നത്.
വിവരമറിഞ്ഞ് ഉന്നത പൊലിസ് ഉദ്യോഗസ്ഥര്‍ സ്ഥലത്തെത്തി. കൈകാര്യം ചെയ്യുന്നതിലെ അശ്രദ്ധയാണ് തോക്ക് പൊട്ടുന്നതിന് ഇടയാക്കിയതെന്നാണ് നിഗമനം. സംഭവം സംബന്ധിച്ച് വകുപ്പ്തല അന്വേഷണത്തിന് ഉത്തരവിട്ടതായി എസ്.പി എന്‍. വിജയകുമാര്‍ അറിയിച്ചു. പാറാവുകാരന്‍ എ.ആര്‍ ക്യാംപിലെ വിജീഷിനെ അന്വേഷണ വിധേയമായി സസ്‌പെന്‍ഡ് ചെയ്തതായും എസ്.പി അറിയിച്ചു.