നാദാപുരം: വീട്ടുപറമ്പില്‍ കണ്ടെത്തിയ പൊതിക്കെട്ടു നാട്ടുകാര്‍ക്കിടയില്‍ ഭീതി പരത്തി. ഇന്നലെ വൈകിട്ട് കുമ്മങ്കോട്ടെ ഏരത്തുവീട്ടിലെ പറമ്പിലാണു പൊതിച്ചതേങ്ങയുടെ വലിപ്പമുള്ള കടലാസുപൊതി കണ്ടെത്തിയത്. ഒറ്റനോട്ടത്തില്‍ ബോംബാണെന്നു തോന്നിച്ച കടലാസിനുമുകളില്‍ സെല്ലോടേപ്പ് ചുറ്റി ഭദ്രമായി ഒട്ടിച്ചനിലയിലായിരുന്നു.
വീട്ടുടമ പരിസരവാസികളെയും പൊലിസിനെയും വിവരം അറിയിക്കുകയായിരുന്നു. ഉടന്‍ സ്‌ഫോടകവസ്തു വിദഗ്ധര്‍ അടക്കമുള്ള പൊലിസുകാര്‍ സ്ഥലത്തെത്തി പരിശോധിച്ചു. കടലാസു കൊണ്ടു പൊതിഞ്ഞുനിര്‍മിച്ച പന്താണെന്നു പൊലിസ് വ്യക്തമാക്കിയതോടെയാണ് ഒരു മണിക്കൂറിലധികംനേരം നീണ്ടുനിന്ന ഉദ്വേഗം അവസാനിച്ചത്.