കൊല്ലം: ബാലാവകാശ വാരാചരണത്തോടനുബന്ധിച്ച് സംസ്ഥാന ബാലാവകാശസംരക്ഷണ കമ്മിഷന്‍ ഈ മാസം 22ന്  എല്ലാ ജില്ലകളിലും കുട്ടികള്‍ക്കായി ക്വിസ് മത്സരം നടത്തും. ജില്ലാ ശിശുസംരക്ഷണ യൂനിറ്റിന്റെ സഹകരണത്തോടെയാണ് മത്സരം സംഘടിപ്പിക്കുന്നത്.
ജില്ലകളില്‍ ആദ്യ മൂന്നു സ്ഥാനങ്ങള്‍ നേടുന്നവര്‍ക്കായി നവംബര്‍ 18ന് തിരുവനന്തപുരത്ത് സംസ്ഥാനതല മത്സരം നടത്തും.
കുട്ടികളുടെ അവകാശവുമായി ബന്ധപ്പെട്ട ഭരണഘടനയിലെ വ്യവസ്ഥകള്‍, ഐക്യരാഷ്ട്രസഭ പുറപ്പെടുവിച്ച നിര്‍ദേശങ്ങള്‍, കുട്ടികളെ സംബന്ധിച്ച ദേശീയസംസ്ഥാന നയങ്ങള്‍, കുട്ടികളുടെ അവകാശം സംബന്ധിച്ച സുപ്രീം കോടതിയുടെ വിധികള്‍, വിദ്യാഭ്യാസാവകാശനിയമം, ജുവനൈല്‍ ജസ്റ്റിസ് ആക്റ്റ്, ബാലാവകാശസംരക്ഷണ കമ്മീഷനുകള്‍ ആക്റ്റ്, ചൈല്‍ഡ് ആന്റ് അഡോളെസന്റ് ലേബര്‍ ആക്റ്റ്, കുട്ടികളെ  ലൈംഗിക കുറ്റകൃത്യങ്ങളില്‍നിന്ന് സംരക്ഷിക്കുന്നതിനുളള ആക്റ്റ്, ശൈശവവിവാഹ നിരോധനിയമം എന്നിവയെ അടിസ്ഥാനമാക്കിയാണ് മത്സരം നടത്തുന്നത്.
സംസ്ഥാനതല വിജയികള്‍ക്ക് നവംബര്‍ 19 ന് തിരുവനന്തപുരത്ത് നടക്കുന്ന ചടങ്ങില്‍ സര്‍ട്ടിഫിക്കറ്റുകള്‍ വിതരണം ചെയ്യും.