ഭുവനേശ്വര്‍: അതിഥി താരമായ ഇഖ്ബാല്‍ അബ്ദുല്ലയുടെ രണ്ടാം ഫസ്റ്റ് ക്ലാസ് സെഞ്ച്വറി (157*) യുടെ കരുത്തില്‍ ഹൈദരാബാദിനെതിരായ രഞ്ജി ട്രോഫി മത്സരത്തില്‍ കേരളത്തിനു കൂറ്റന്‍ സ്‌കോര്‍.
രണ്ടാം ദിനം കളി നിര്‍ത്തുമ്പോള്‍ കേരളം ഒന്‍പതു വിക്കറ്റ് നഷ്ടത്തില്‍ 506 റണ്‍സെന്ന മികച്ച സ്‌കോര്‍ സ്വന്തമാക്കി. 157 റണ്‍സുമായി ഇഖ്ബാല്‍ അബ്ദുല്ല പുറത്താകാതെ നില്‍ക്കുന്നു. ഒരു റണ്‍സുമായി സന്ദീപ് വാര്യരാണ് ഒപ്പം ക്രീസില്‍.
നാല് വിക്കറ്റിനു 223 എന്ന നിലയില്‍ രണ്ടാം ദിനം ആരംഭിച്ച കേരളത്തിനായി സച്ചിന്‍ ബേബി (80), ജലജ് സക്‌സേന (79), രോഹന്‍ പ്രേം (41), മോനിഷ് (40) എന്നിവരും തിളങ്ങി. 214 പന്തില്‍ നിന്ന് ആറു സിക്‌സും 14 ബൗണ്ടറിയും ഉള്‍പ്പെട്ടതായിരുന്നു ഇഖ്ബാല്‍ അബ്ദുല്ലയുടെ ഇന്നിങ്‌സ്. എട്ടാം വിക്കറ്റില്‍ അബ്ദുല്ല- മോനിഷ് സഖ്യം 141 റണ്‍സ് കൂട്ടിച്ചേര്‍ത്തു. ഹൈദരാബാദിനായി മെഹ്ദി ഹസന്‍ മൂന്നു വിക്കറ്റ് വീഴ്ത്തി. രഞ്ജിയില്‍ കേരളത്തിന്റെ മൂന്നാം മത്സരമാണിത്. ആദ്യ മത്സരത്തില്‍ ജമ്മു- കശ്മിരുമായി സമനിലയില്‍ പിരിഞ്ഞ കേരളം രണ്ടാം മത്സരത്തില്‍ ഹിമാചല്‍ പ്രദേശിനോടു അപ്രതീക്ഷിതമായി പരാജയപ്പെട്ടിരുന്നു.