മാള: ബൈക്കിലെത്തിയ മോഷ്ടാക്കള്‍ കടയുടമയായ സ്ത്രീയുടെ ഒന്നര പവന്‍ വരുന്ന സ്വര്‍ണമാല പൊട്ടിച്ച് കടന്നു. കുരുവിലശ്ശേരി പള്ളിയില്‍ സദാശിവന്റെ ഭാര്യ സീനയുടെ മാലയാണ് കഴിഞ്ഞ ദിവസം വൈകീട്ട് ആറുമണിയോടെ ബൈക്കിലെത്തിയ രണ്ട് യുവാക്കള്‍ മോഷ്ടിച്ച് കടന്നത്. ഇവരുടെ ഭര്‍ത്താവ് നടത്തുന്ന പലചരക്ക് കടയില്‍ സാധനങ്ങള്‍ വാങ്ങാനെന്ന വ്യാജേനയെത്തിയ യുവാവ് ആവശ്യപ്പെട്ട സാധനം എടുക്കാനായി തിരിഞ്ഞപ്പോഴാണ് മാല പൊട്ടിച്ച് ഓഫാക്കാതെ നിര്‍ത്തിയിരുന്ന ബൈക്കില്‍ കടന്നത്. മാള പൊലിസ് കേസെടുത്ത് അന്വേഷണം ആരംഭിച്ചു. കുറച്ചു നാളായി മാള മേഖലയില്‍ തുടരുന്ന മോഷണം മറ്റൊരു രൂപത്തില്‍ തുടരുകയാണ്. നേരത്തെ മോഷ്ടാക്കള്‍ ആവശ്യപ്പെടുന്നവ എടുക്കാനായി കടയുടമ നീങ്ങുമ്പോള്‍ ക്യാഷ് കൗണ്ടറില്‍ നിന്നും പണമെടുത്ത് കടന്നു കളയുകയായിരുന്നു. നിരവധി സ്ഥാപനങ്ങളില്‍ നിന്നും പട്ടാപ്പകല്‍ മോഷണം നടന്നിട്ടും പൊലിസിന് ഇക്കാര്യത്തില്‍ യാതൊരു തുമ്പുമുണ്ടാക്കാനാകാത്തതില്‍ പ്രതിഷേധം വ്യാപകമായി ഉയരുന്ന സമയത്താണ് രീതി മാറ്റിയുള്ള മോഷണം നടന്നിരിക്കുന്നത്.