കൊല്‍ക്കത്ത: സ്വന്തം ഗ്രൗണ്ടില്‍ ഹ്യൂമിന്റെ ഗോൡ കൊല്‍ക്കത്തയ്ക്ക് വിജയം. തങ്ങളുടെ ചീത്തപ്പേര് മാറ്റിയ മല്‍സരമായിരുന്നു കൊല്‍ക്കത്തയ്ക്ക് ഈ വിജയം. ഐ.എസ്.എല്‍ മൂന്നാം സീസണ്‍ എത്തി നില്‍ക്കെ ഇതു വരെ കൊല്‍ക്കത്തയ്ക്ക് ചെന്നൈയ്‌ക്കെതിരേ വിജയിക്കാന്‍ കഴിഞ്ഞിരുന്നില്ല. മല്‍സരത്തിന്റെ 78ാം മിനുറ്റില്‍ പെനാല്‍റ്റിയിലൂടെ ആ ദുഷ്‌പേര് കൊല്‍ക്കത്ത മാറ്റി.

സീസണില്‍ ഇതു വരെ മികച്ച പ്രകടനം പുറത്തെടുക്കാന്‍ ടീമെന്ന നിലയില്‍ കൊല്‍ക്കത്തയ്ക്ക് കഴിഞ്ഞിരുന്നില്ല. കൂടാതെ പോയിന്റ് പട്ടികയില്‍ അഞ്ചാം സ്ഥാനവും. വിജയം മാത്രം ലക്ഷ്യമാക്കി ഇറങ്ങിയ കൊല്‍ക്കത്തയെ വെള്ളം കുടിപ്പിക്കുന്ന കളിയാണ് ഡല്‍ഹി ഡൈനാമോസ് പുറത്തെടുത്തത്. മല്‍സരത്തിന്റെ ആദ്യപാദത്തില്‍ ഇരു ടീമുകളും ഗോളൊന്നും നേടാതെ പിരിഞ്ഞു.

രണ്ടാം പകുതിയിലാണ് ഇരു ടീമുകളും മല്‍സരത്തില്‍ വിജയത്തിനായി പോരാടിയത്. മുന്നേറ്റങ്ങള്‍ കൊണ്ടും പ്രതിരോധങ്ങള്‍ കൊണ്ടും കളം നിറഞ്ഞതായിരുന്നു രണ്ടാം പകുതി മല്‍സരത്തില്‍. ചെന്നൈയുടെ ഗോളെന്നുറച്ച നിരവധി അവസരങ്ങളാണ് കൊല്‍ക്കത്തന്‍ ഗോളിയായ ദെബ്ജിത് മജുംദാര്‍ തട്ടിയകറ്റിയത്.

മല്‍സരത്തില്‍ വിജയം തങ്ങള്‍ക്കൊപ്പമാണെന്ന് തെളിയിക്കേണ്ടിയിരുന്ന അവസരമാണ് 75ാം മിനുറ്റില്‍ കിട്ടിയ പെനാല്‍റ്റി നഷ്ടപ്പെടുത്തിയതിലൂടെ ചെന്നൈ കളഞ്ഞു കുളിച്ചത്. പോസ്റ്റിനുള്ളിവച്ച് റിച്ചാര്‍ഡ്‌സ് ഗാഡ്‌സെയെ ഫൗള്‍ ചെയ്തതിന് എന്റീക്കോ സെറീനോയ്ക്ക് റഫറി മഞ്ഞക്കാര്‍ഡ് കാണിച്ചു. രണ്ടാമതും മഞ്ഞക്കാര്‍ഡ് കിട്ടിയതോടെ സെറീനോ ചുവപ്പ് കാര്‍ഡ് കിട്ടി കളത്തിനു പുറത്തേക്ക്. തുടര്‍ന്ന് ലഭിച്ച പെനാല്‍റ്റി കിക്കെടുത്ത മാര്‍ലോയ്ക്ക് ലക്ഷ്യത്തിലെത്തിക്കാനായില്ല.

തൊട്ടുപിന്നാലെ കൊല്‍ക്കത്തയ്ക്ക് അനുകൂലമായി പെനാല്‍റ്റി ലഭിച്ചു. കിക്കെടുത്ത ഹ്യൂമിന് പിഴച്ചില്ല. ഗോളോടെ ഐ.എസ്.എല്ലില്‍ ഏറ്റവും കൂടുതല്‍ ഗോളുകള്‍ നേടുന്ന താരമെന്ന റെക്കോര്‍ഡും ഇയാന്‍ ഹ്യൂമിന് സ്വന്തം.