പൂനെ: ഐ.എസ്.എല്ലിലെ സമനില വിടാത്ത മത്സരങ്ങളുടെ എണ്ണത്തിലേക്ക് മറ്റൊന്നു കൂടി. പൂനെ സിറ്റി എഫ്.സി നിലവിലെ ചാംപ്യന്‍മാരായ ചെന്നൈയിന്‍ എഫ്.സിയെ 1-1നു സമനിലയില്‍ കുരുക്കി.   സ്വന്തം തട്ടകത്തില്‍ ഒരു ഗോളിനു പിന്നില്‍ നിന്ന ശേഷമാണ് പൂനെ സമനില പിടിച്ചത്.  ചെന്നൈയിനായി ജെജെ ലാല്‍പെഖുല 28ാം മിനുട്ടില്‍ വല ചലിപ്പിച്ചപ്പോള്‍ പകരക്കാരനായി ഇറങ്ങിയ അനിബല്‍ സര്‍ദോ 82ാം മിനുട്ടില്‍ പൂനെയ്ക്ക് സമനിലയുടെ ആശ്വസം സമ്മാനിക്കുകയായിരുന്നു.
28ാം മിനുട്ടില്‍ ലാല്‍റിന്‍സ്വലയുടെ  പാസില്‍നിന്നാണ് ജെജെ ലാല്‍പെഖുല ഗോള്‍ നേടിയത്. പാസ് സ്വീകരിച്ച് ജെജെ പന്ത് ഇടങ്കാല്‍ കൊണ്ട് പോസ്റ്റിലേക്ക് ഉയര്‍ത്തിയടിക്കുമ്പോള്‍ സ്ഥാനം തെറ്റിനിന്ന പൂനെ ഗോളിക്ക് നിസ്സഹായനായി നില്‍ക്കാനെ സാധിച്ചുള്ളു. പിന്നീട് ഇരു ടീമുകളും ഗോളുകള്‍ നേടിയില്ല.
80ാം മിനുട്ടില്‍ പകരക്കാരനായി കളത്തിലെത്തിയ അനിബല്‍ രണ്ടു മിനുട്ട് കഴിഞ്ഞപ്പോള്‍ പൂനെയുടെ ഹീറോയായി.  82ാം മിനുട്ടില്‍ ഫ്രീ കിക്കില്‍നിന്നായിരുന്നു ഗോളിന്റെ പിറവി.
സമനില പിടിച്ച് പൂനെ അഞ്ചു പോയിന്റുകളുമായി ആറാം സ്ഥാനത്തേക്ക് കയറി. കേരള ബ്ലാസ്റ്റേഴ്‌സ് ഏഴാം സ്ഥാനത്തേക്കിറങ്ങി.