ദേശമംഗലം: പഞ്ചായത്തിലെ പല്ലൂര്‍ മേഖലയില്‍ വാനര ശല്യം അതിരൂക്ഷം. മലബാര്‍ എന്‍ജിനീയറിങ് കോളജിലെ ജനവാസ മേഖലയിലാണ് വാനരന്മാര്‍ അരങ്ങുവാഴുന്നത്. ഇതിനെ തുടര്‍ന്ന് ജനങ്ങള്‍ക്കു വീടിനുള്ളില്‍ കഴിയാനാവാത്ത അവസ്ഥയാണ്. 50 ഓളം കുരങ്ങന്മാരാണ് വനവാസമൊക്കെ ഉപേക്ഷിച്ച് നാട്ടു വാസത്തിന് എത്തിയിട്ടുള്ളത്. മേഖലയിലെ കൃഷികളെല്ലാം കൂട്ടത്തോടെ നശിപ്പിക്കുകയാണ് വാനരപ്പട. തെങ്ങുകളില്‍ നിന്നു നാളികേരം പോലും പിഴുതെടുത്തു നശിപ്പിക്കുകയാണ്. വാനരപ്പടയെ തുരത്താന്‍ അധികൃതരുടെ ഭാഗത്തു നിന്ന് ഒരു നടപടിയും ഉണ്ടാകുന്നില്ലെന്ന പരാതിയും ശക്തമാണ്. നാട്ടുകാര്‍ പടക്കം പൊട്ടിച്ചും പാട്ടകളില്‍ കൊട്ടിയുമൊക്കെയാണ് കുരങ്ങന്മാരെ അകറ്റുന്നത്. എന്നാല്‍ ഇതു കൊണ്ടാന്നും ഒരു കാര്യവുമില്ലെന്നും ജനങ്ങള്‍ പറയുന്നു.