കയ്പമംഗലം: കാളമുറി സെന്റര്‍ മുതല്‍ പനമ്പിക്കുന്ന് വരെയുള്ള ഭാഗത്ത് ഒരാഴ്ചയായി തുടരുന്ന വൈദ്യുതി മുടക്കത്തിന് പരിഹാരമായില്ല. രാപകലില്ലാതെ ദിനം പ്രതി ഡസനിലധികം തവണയാണ് ഇവിടെ വൈദ്യുതി തടസപ്പെടുന്നത്.
ട്രാന്‍സ്‌ഫോര്‍മര്‍ തകരാറ്, ലൈന്‍ തകരാറ്, ടച്ചിങ്ങ്‌സ് വെട്ടല്‍ തുടങ്ങി പല കാരണങ്ങളും അധികൃതര്‍ പറയുന്നുണ്ടെങ്കിലും കൃത്യമായ മറുപടി പറയാന്‍ അധികൃതര്‍ക്ക് ആവുന്നില്ല. ഈ ഭാഗത്തുള്ള തൊഴില്‍ സ്ഥാപനങ്ങളും കടയുടമകളും ഇതുമൂലം പ്രയാസം അനുഭവിക്കുകയാണ്.
സ്ഥിരമായി വൈദ്യുതി മുടങ്ങുന്നതു മൂലം ദിവസവും വലിയ സാമ്പത്തിക നഷ്ടമാണ് ഇവര്‍ നേരിട്ടുകൊണ്ടിരിക്കുന്നത്. അടിക്കടിയുണ്ടാകുന്ന വൈദ്യുതി മുടക്കത്തിന് അടിയന്തിരമായി പരിഹാരം കാണണമെന്ന് നാട്ടുകാര്‍ ആവശ്യപ്പെട്ടു.