കണ്ണൂര്‍: ആര്‍.ടി.ഒ നിയമ വിരുദ്ധമായി പെര്‍മിറ്റ് നല്‍കുന്നുവെന്ന് ആരോപിച്ച് തലശ്ശേരി വഴി സര്‍വിസ് നടത്തുന്ന ബസുകളുടെ ഉടമകളും തൊഴിലാളികളും ആര്‍.ടി ഓഫിസ് ഉപരോധിച്ചു. ആര്‍.ടി.ഒയും ഏജന്റുമാരും നടത്തുന്ന ഒത്തുകളി അവസാനിപ്പിക്കണമെന്ന് ആവശ്യപ്പെട്ടായിരുന്നു പാനൂര്‍, തലശ്ശേരി, അഞ്ചരക്കണ്ടി റൂട്ടുകളിലെ ബസുടമ തൊഴിലാളി ഐക്യവേദിയുടെ നേതൃത്വത്തില്‍ ആര്‍.ടി ഓഫിസ് ഉപരോധിച്ചത്.
നിലവില്‍ ഈ റൂട്ടുകളില്‍ മൂന്നു മിനിറ്റ് ഇടവേളകളിലാണു സര്‍വിസ് നടത്തുന്നത്. പുതിയ പെര്‍മിറ്റ് അനുവദിക്കുന്നതിലൂടെ ബസുകളുടെ ഇടവേള ചുരുങ്ങുകയും മത്സരയോട്ടത്തിന് ഇതു വഴിവയ്ക്കുകയും ചെയ്യും. ആര്‍.ടി ഓഫിസ് ഉദ്യോഗസ്ഥരും മറ്റും കോടതിയെ തെറ്റിദ്ധരിപ്പിച്ചാണു പെര്‍മിറ്റ് വാങ്ങുന്നതെന്നും ബസുടമകള്‍ പറഞ്ഞു.
നിയമവിരുദ്ധമായി ബസുകള്‍ക്കു പെര്‍മിറ്റ് നല്‍കിയ കാര്യം പരിശോധിക്കാന്‍ ഇന്നു സമയനിര്‍ണയ യോഗം ചേരുമെന്നു ആര്‍.ടി.ഒ കെ.സി മോഹനന്‍ നമ്പ്യാര്‍ സമരക്കാരെ അറിയിച്ചു. പെര്‍മിറ്റുമായി ബന്ധപ്പെട്ട് ഹൈക്കോടതിയില്‍ കേസ് വരുമ്പോള്‍ സര്‍ക്കാര്‍ അഭിഭാഷകര്‍ ഹാജരാകാത്ത കാര്യം അഡ്വക്കറ്റ് ജനറലിനെ അറിയിക്കുമെന്നും ആര്‍.ടി.ഒ ഉറപ്പുനല്‍കി. പ്രൈവറ്റ് ബസ് ഓപ്പറേറ്റേഴ്‌സ് സംസ്ഥാന പ്രസിഡന്റ് കെ വേലായുധന്‍ ഉദ്ഘാടനം ചെയ്തു. കെ രാഘവന്‍ അധ്യക്ഷനായി. കെ ബിജു, കെ ഗംഗാദരന്‍, സി.കെ റോജിന്‍ സംസാരിച്ചു.