ആലപ്പുഴ: കര്‍ഷകര്‍ കൃഷിയിറക്കാനായി ഉഴുതുമറിച്ചിട്ട പാടങ്ങള്‍ക്ക് അനുഗ്രഹമായി പെയ്ത മഴ നല്ല സൂചനയാണ് നല്‍കുന്നതെന്ന് പ്രതിപക്ഷ നേതാവ് വി.എസ് അച്യുതാനന്ദന്‍. അമ്പലപ്പുഴയിലെ പുന്നപ്ര പറവൂര്‍ ഗവ. ഹയര്‍സെക്കന്‍ഡറി സ്‌കൂളില്‍ വോട്ടു ചെയ്യാനെത്തിയ വി.എസ് മാധ്യമ പ്രവര്‍ത്തകരോട് സംസാരിക്കുകയായിരുന്നു.

എല്‍.ഡി.എഫിന് അനുകൂലമായ നല്ലതരംഗമാണ്. വ്യാപകമായി ഇടത് തരംഗം നിലനില്‍ക്കുന്നു. വന്‍വിജയം നേടും. വിജയം നേടുമെന്ന് ഉമ്മന്‍ചാണ്ടി പറയുന്നത് വിഢിത്തമാണ്. കോടതിയില്‍ ഉള്‍പ്പടെ എല്ലായിടത്തും തോറ്റ ഉമ്മന്‍ചാണ്ടി നാണമില്ലാതെ ഭരണം തുടരുകയാണ്. കേരളത്തില്‍ താമര വാടുകയേ ഉള്ളൂ. താമര വല്ലകുളത്തിലും വിരിയും അല്ലെങ്കില്‍ വാടും. മലമ്പുഴയില്‍ തന്നെ തോല്‍പ്പിക്കാന്‍ ശത്രുക്കളായ പലരും ശ്രമിച്ചു. എന്നാല്‍ ശത്രുക്കള്‍ ആരെന്ന് വ്യക്തമാക്കാന്‍ വി.എസ് തയ്യാറായില്ല.

കുടുംബസമേതം എത്തിയാണ് വി.എസ് വോട്ടു ചെയ്തത്. സാധാരണയായി രാവിലെ തന്നെ വോട്ടു ചെയ്യാറുള്ള വി.എസ് മലമ്പുഴയില്‍ നിന്ന് ഉച്ചക്കഴിഞ്ഞാണ് പറവൂരില്‍ എത്തിയത്. ഭാര്യ വസുമതി, മകന്‍ വി.എ അരുണ്‍കുമാര്‍, മരുമകള്‍ ഡോ. രജനി എന്നിവരും വോട്ടു ചെയ്യാന്‍ ഒപ്പമെത്തിയിരുന്നു.