ശ്രീകാര്യം: ബൈപ്പാസ് റോഡില്‍ ആക്കുളത്തിനു സമീപം കുഴിവിളയില്‍ ബൈക്കും കാറും കൂട്ടിയിടിച്ച് ബൈക്ക് യാത്രികനായ യുവാവ് മരിച്ചു.
കുളത്തൂര്‍ കല്ലിംഗല്‍ കാട്ടില്‍ വീട്ടില്‍ കുമാര്‍-ഓമന ദമ്പതികളുടെ മകന്‍ അരുണ്‍ എസ്. കുമാര്‍ (23) ആണ് മരിച്ചത്. കൂടെ യാത്രചെയ്തിരുന്ന സുഹൃത്ത് കഴക്കൂട്ടം കോട്ടക്കരിയില്‍ വീട്ടില്‍ ഗിരീഷ്
ലാലിനെ  പരുക്കുകളോടെ സ്വകാര്യ ആശുപത്രിയില്‍ പ്രവേശിപ്പിച്ചു.
ബുധനാഴ്ച രാത്രി പതിനൊന്നുമണിയോടുകൂടിയായിരുന്നു അപകടം. കുളത്തൂര്‍ ഭാഗത്തേയ്ക്ക് വരികയായിരുന്നബൈക്കിനു പിന്നില്‍ കഴക്കൂട്ടം ഭാഗത്ത് നിന്നു വന്ന കാര്‍ ഇടിക്കുകയായിരുന്നു. ഇടിയുടെ ആഘാതത്തില്‍ ബൈക്കിനു പിന്നിലിരുന്ന അരുണ്‍ എസ്. കുമാര്‍ തെറിച്ച് വീഴുകയായിരുന്നു. തലയ്ക്ക് ഗുരുതരമായ പരുക്കേറ്റ  അരുണിനെയും നട്ടെല്ലിന് പരിക്കേറ്റ  ഗിരീഷ് ലാലിനെയും ഉടന്‍ തന്നെ സ്വകാര്യ ആശുപത്രിയില്‍ എത്തിച്ചവെങ്കിലും ഇന്നലെ പുലര്‍ച്ചെ അരുണ്‍ മരിച്ചു.
അരുണ്‍  കല്ലിംഗല്ലിലെ സ്വകാര്യ കമ്പനിയില്‍ ജോലി നോക്കി വരികയായിരുന്നു.
മൃതദേഹം വൈകുന്നേരം മൂന്നരയോടെ കുളത്തൂര്‍ കോലത്തുകര ശ്മശാനത്തില്‍ സംസ്‌കരിച്ചു.