സിഡ്‌നി: ഇന്ത്യന്‍ വംശജനായ ബസ് ഡ്രൈവറെ ഓസ്‌ട്രേലിയയില്‍ യാത്രക്കാരന്‍ തീകൊളുത്തി കൊന്നു. 29 കാരനായ മന്‍മീത് അലിഷറിനെയാണ് മറ്റ് യാത്രക്കാര്‍ നോക്കിനില്‍ക്കെ അതിദാരുണമായി കൊലപ്പെടുത്തിയത്. ബ്രിസ്‌ബെയിനിലാണ് സംഭവം നടന്നത്.

തീ പിടിക്കുന്ന ദ്രാവകം അലിഷറിന്റെ ദേഹത്തൊഴിച്ച ശേഷം തീ കൊളുത്തുകയായിരുന്നു. പ്രകോപനമൊന്നുമില്ലാതെയാണ് അലിഷറിനു നേരെ ആക്രമണമുണ്ടായതെന്ന് പൊലിസ് പറഞ്ഞു.

ബസ്സില്‍ തീ പടരാത്തത് വന്‍ ദുരന്തം ഒഴിവാക്കി. ബസ്സിന്റെ പിന്‍വാതില്‍ തകര്‍ത്താണ് മറ്റു യാത്രക്കാരെ രക്ഷപ്പെടുത്തിയത്. സംഭവത്തില്‍ 48 കാരനായ പ്രതിയെ സമീപത്തു നിന്നും പൊലിസ് കസ്റ്റഡിയിലെടുത്തു.