ഇന്ത്യാമഹാരാജ്യം വീണ്ടുമൊരു തെരഞ്ഞെടുപ്പ് ഗോധയിലേക്കുള്ള തയാറെടുപ്പിലാണ്. ജാതി സമവാക്യങ്ങള്‍ വോട്ടുബാങ്കിനെ ഗണ്യമായി സ്വാധീനിക്കുന്ന ഉത്തര്‍പ്രദേശ് നിയമസഭാ തെരഞ്ഞെടുപ്പാണ് ഇതിലേറ്റവും ശ്രദ്ധേയം. തെരഞ്ഞുടുപ്പു വാഗ്ദാനങ്ങളേക്കാളും ഉത്തര്‍പ്രദേശ് വാര്‍ത്താപ്രാധാന്യം നേടുന്നതും കുടുംബ കലഹമൂലമാണെന്നത് ഏറെ നിരാശാജനകമാണ്.

പ്രശാന്ത് ഭൂഷണിന്റെ തന്ത്രങ്ങളുമായി രാഹുല്‍ഗാന്ധി നടത്തിക്കൊണ്ടിരിക്കുന്ന കിസാന്‍ യാത്ര വാര്‍ത്താപ്രാധാന്യം നേടാത്തതില്‍ കോണ്‍ഗ്രസ് തീര്‍ത്തും ആശങ്കാകുലരാണ്. ഉള്‍പ്പാര്‍ട്ടി പോര് ശക്തമായ എസ്.പിയും ഏകാധിപത്യ സ്വഭാവത്തിലൂന്നിയ ബി.എസ്.പിയും ഉത്തര്‍പ്രദേശ് നിയമസഭാ ചരിത്രത്തിലെ നിര്‍ണായക പാര്‍ട്ടികളായി ഇന്നും തുടരുന്നു. ബ്രഹ്മണ, യാദവ, മുസ്‌ലിംവോട്ടുകള്‍ വിജയം തീരുമാനിക്കുന്ന അസംഖ്യം ചില തെരഞ്ഞെടുപ്പുകളിലൊന്നുകൂടിയാണിത്. പടിഞ്ഞാറന്‍ യു.പി പിടിക്കാന്‍ അന്‍വര്‍ സിദ്ദീഖിയുടെ മകനെ കളത്തിലിറക്കുന്ന ബി.എസ്.പി നടപടിയും വിജയതന്ത്രത്തിന്റെ ഭാഗമാണ്. എന്നാലും ഉള്‍പാര്‍ട്ടി പ്രശ്‌നങ്ങള്‍ തെരഞ്ഞെടുപ്പിനെ സാരമായി ബാധിക്കുന്നുവോ എന്ന് നാം ന്യായമായും സംശയിക്കേണ്ടി യിരിക്കുന്നു.

ബി.ജെ.പി മുഖ്യമന്ത്രി സ്ഥാനാര്‍ഥിത്വം കല്‍പിക്കപ്പെടുന്നവരില്‍ പ്രധാനിയായ വരുണ്‍ ഗാന്ധി ഹണിട്രാപ്പില്‍ അകപ്പെട്ടതും രാഷ്ട്രീയ കരുനീക്കങ്ങളുടെ ഭാഗമായിട്ടാണ്. സമാജ്‌വാദി പാര്‍ട്ടിയിലെ ശിവ്പാല്‍യാദവും അഖിലേഷ് യാദവും തമ്മിലുള്ള രാഷ്ട്രീയ അനൈക്യം സംസ്ഥാനത്തെ ഭരണപ്രതിസന്ധിയിലേക്കാണ് നയിച്ചുകൊണ്ടിരിക്കുന്നത്. മുലായം സിങിന്റെ രണ്ടാം ഭാര്യ സാധനഗുപ്തക്കെതിരേയുള്ള ആരോപണങ്ങളാണ് തെരഞ്ഞെടുപ്പിനെ വികൃതമാക്കാന്‍ തുടങ്ങിയത്.

സെപ്റ്റബര്‍ പതിനൊന്നിന് പാര്‍ട്ടി ലീഡര്‍ ഡല്‍ഹിയിലൊരുക്കിയ സല്‍ക്കാരമാണ് പുതിയ തലവേദനകള്‍ക്ക് തുടക്കമിട്ടത്. ചീഫ് സെക്രട്ടറി ദീപക് സിംഗളും പാര്‍ട്ടി സംസ്ഥാന അധ്യക്ഷനായിരുന്ന ശിവ്പാല്‍ യാദവും പങ്കെടുത്തവിരുന്ന് ശ്രദ്ധേയമായത് അഖിലേഷിന്റെ അസാന്നിധ്യത്താലാണ്. തനിക്കെതിരേയുള്ള ചര്‍ച്ചകളായിരുന്നു വിരുന്നിന്റെ മുഖ്യ അജണ്ടയെന്ന് അഖിലേഷും തുറന്നടിച്ചു.

അഴിമതി ആരോപണത്തിന്റെ പേരില്‍ ഗായത്രി പ്രജാപതി, രാജ്കിഷോര്‍ തുടങ്ങിയവരെ മന്ത്രിസഭയില്‍ നിന്ന് പുറത്താക്കിയതും അഖിലേഷിന്റെ പ്രതികാര നടപടികളുടെ ഭാഗമായിരുന്നു. എങ്കിലുംഗായത്രി പ്രജാപതി വീണ്ടും മന്ത്രിസഭയിലേക്ക് തെരഞ്ഞെടുക്കപ്പെട്ടു.

1990കളില്‍ പാര്‍ട്ടിയെ ഉത്തര്‍പ്രദേശില്‍ വളര്‍ത്തുന്നതില്‍ മുലായത്തിനൊപ്പം നിറസാന്നിധ്യമായിരുന്നു ശിവ്പാല്‍യാദവ്. സാഹോദര്യ ബന്ധംകൂടി അവര്‍ക്കിടയിലുണ്ട്. ഡല്‍ഹി വിരുന്നിന്റെ വാര്‍ത്ത ലഭിച്ചയുടന്‍ സെപ്റ്റംബര്‍ പതിനഞ്ചിന് ചീഫ് സെക്രട്ടറിയെ തല്‍സ്ഥാനത്ത് നിന്ന് നീക്കുകയും ശിവ്പാലിന്റെ വകുപ്പുകള്‍ നേരിട്ട് ഏറ്റെടുക്കുകയും ചെയ്തിരുന്നു. പാര്‍ട്ടിയുടെ യുവമുഖം നിലനിര്‍ത്തുന്ന അഖിലേഷിനെ തന്ത്രപൂര്‍വം മെരുക്കിയെടുക്കുന്നതില്‍ മുലായം വിജയിച്ചതിനെ പ്രശ്‌നം രമ്യമായി പരിഹരിക്കപ്പെട്ടു.

പാര്‍ട്ടി രജതജൂബിലി ആഘോഷങ്ങള്‍ നവംബര്‍ അഞ്ചിന് ആരംഭിക്കാനിരിക്കെ തെരഞ്ഞെടുപ്പ് പ്രചാരണഭാഗമായി നവംബര്‍ മൂന്നിന് അഖിലേഷ് പ്രഖ്യാപിച്ച രഥയാത്ര പാര്‍ട്ടിക്ക് തീരാ തലവേദനയാണ് സൃഷ്ടടിച്ചിട്ടുള്ളത്. പുതിയപാര്‍ട്ടി രൂപീകരണത്തിലേക്കും അഖിലേഷ് മുതിരുമോ എന്നും രാഷ്ട്രീയനിരീക്ഷകര്‍ ഉറ്റു നോക്കുന്നു. ഫാസിസ്റ്റ് ഭരണം ഇന്നതിന്റെ വിരാട് രൂപം പ്രാപിച്ചുകൊിരിക്കുന്നദശാസന്ധന്തിയില്‍ തീര്‍ച്ചയായും ഉത്തര്‍പ്രദേശ് നിയമസഭാ തെരഞ്ഞെടുപ്പ് വളരെനിര്‍ണായകമാണ്. പാര്‍ട്ടി അനൈക്യങ്ങള്‍ രമ്യമായി പരിഹരിച്ചുകൊണ്ട് ന്യൂനപക്ഷവിഭാഗങ്ങളെ രാഷ്ട്രീയ മണ്ഡലത്തില്‍ സജീവമായി നിലനിര്‍ത്താന്‍ ഓരോ പാര്‍ട്ടിയും പരിശ്രമിച്ചില്ലെങ്കില്‍ ഫാസിസ്റ്റുകള്‍ക്ക് പരവതാനിവിരിക്കലാകുമത്.