ഭോപ്പാല്‍: പ്രേമാഭ്യര്‍ഥന നിരസിച്ചതിന് കോളജ് വിദ്യാര്‍ഥിനിയെ ബസ്സില്‍ നിന്നും പിടിച്ചിറക്കി കുത്തിക്കൊന്നു. മധ്യപ്രദേശിലാണ് സംഭവം. ഭോപ്പാലില്‍ നിന്നും 600 കിലോമീറ്റര്‍ അകലെയുള്ള കുസുമി പ്രദേശത്തു വച്ചാണ് 19 കാരിയായ കോളജ് വിദ്യാര്‍ഥിനിയെ ശിവേന്ദ്ര സിങ് പരിഹാര്‍ (23)കൊലപ്പെടുത്തിയത്. ദീപാവലി ആഘോഷിക്കാന്‍ വീട്ടിലേക്ക് പുറപ്പെട്ടതായിരുന്നു വിദ്യാര്‍ഥിനി.
ശിവേന്ദ്ര സിങ് പെണ്‍കുട്ടിയോട് പ്രേമാഭ്യര്‍ഥന നടത്തിയിരുന്നു. ഇത് പെണ്‍കുട്ടി അവഗണിച്ചതാണ് യുവാവിനെ കൊടുംക്രൂരതയ്ക്ക് പ്രേരിപ്പിച്ചതെന്നാണ് കരുതുന്നത്.  ഒരു കാനില്‍  പെട്രോളുമായാണ് പാതി വഴിക്കു വച്ച് ഇയാള്‍ ബസില്‍ കയറിയത്. സിങിനെ കണ്ട പെണ്‍കുട്ടി ഒളിച്ചിരിക്കാന്‍ ശ്രമിച്ചു. എന്നാല്‍ പെണ്‍കുട്ടിയെ കണ്ടെത്തി സിങ് അവളെ ശല്യപ്പെടുത്താന്‍ തുടങ്ങി. ഇതു ശ്രദ്ധയില്‍പ്പെട്ട മറ്റുയാത്രക്കാര്‍ പ്രശ്‌നത്തില്‍ ഇടപെടുകയും പെണ്‍കുട്ടിയെ മറ്റൊരു സീറ്റിലേക്ക് മാറ്റുകയും ചെയ്തു. എന്നാല്‍ കുറച്ചു സമയത്തിനു ശേഷം ഇയാള്‍ ബസ് നിര്‍ത്താന്‍ ഡ്രൈവറോട് ആവശ്യപ്പെടുകയും കൈയില്‍ കരുതിയിരുന്ന പെട്രോള്‍ യുവതിയുടെ ശരീരത്തില്‍ ഒഴിക്കുകയും ചെയ്തു.
കൂടാതെ ആരെങ്കിലും പെണ്‍കുട്ടിയെ രക്ഷിക്കാന്‍ ശ്രമിച്ചാല്‍ ബസ് കത്തിക്കുമെന്ന് ഭീഷണി മുഴക്കുകയും ചെയ്തു. തുടര്‍ന്ന് പെണ്‍കുട്ടിയെ ബസില്‍ നിന്നും വലിച്ചിറക്കി യാത്രക്കാരുടെ മുന്നിലിട്ട് കുത്തിക്കൊല്ലുകയായിരുന്നു.