വടകര: പാലോളി പാലത്ത് വച്ച് ടിപ്പര്‍ ലോറി മോഷണം പോയ കേസില്‍ മൂന്ന് പ്രതികള്‍ കര്‍ണാടകയില്‍ അറസ്റ്റിലായി. കാസര്‍ഗോഡ് അണങ്കൂര്‍ സ്വദേശി കൊല്ലമ്പാടി മുഹമ്മദ് സലീം എന്ന അണങ്കൂര്‍ സലിം (50), പത്തനംതിട്ട സാമൂര്‍ സ്വദേശി കട്ടാത്താഴ ഷാജു വര്‍ഗീസ് എന്ന സാജു (43), മലപ്പുറം നിലമ്പൂര്‍ സ്വദേശി പൂതാന്‍ അപ്പച്ചാലില്‍ മുഹമ്മദ് ഷാഫി (20) എന്നിവരെയാണ് വടകര സി.ഐയുടെ നേതൃത്വത്തിലുള്ള സ്‌ക്വലഡ് അംഗങ്ങള്‍ അറസ്റ്റു ചെയ്തത്. കഴിഞ്ഞ ഓഗസസ്റ്റ് അഞ്ചിനാണ് വടകര പാലോളിപാലത്തെ തെക്കെ കൊയ്‌ലോത്ത് വയലില്‍ പി.കെ. രാജീവന്റെ ഉടമസ്ഥതയിലുള്ള കെ.എല്‍ 18 ജി. 3329 നമ്പര്‍ ടിപ്പര്‍ ലോറി കളവു ചെയ്യപ്പെട്ടത്. കവര്‍ച്ച നടത്തിയ വാഹനം പ്രതികള്‍ കാസര്‍ഗോഡ് എത്തിച്ച് മണല്‍ക്കടത്തുകാര്‍ക്ക് വില്‍പന നടത്തുകയായിരുന്നു.
മറ്റൊരു കേസില്‍ കര്‍ണാടക മടിക്കരി കുശാല്‍ നഗര്‍ പൊലിസ് പ്രതികളെ അറസ്റ്റു ചെയ്തപ്പോഴാണ് വടകരയില്‍ നിന്നും ലോറി മോഷ്ടിച്ച കാര്യവും പ്രതികള്‍ പൊലിസിന് മൊഴി നല്‍കിയത്. ഈ കേസില്‍ കര്‍ണാടകയില്‍ ജുഡീഷ്യല്‍ കസ്റ്റഡിയിലായിരുന്ന പ്രതികളെ വടകരയില്‍ നിന്നുള്ള അന്വേഷണ സംഘം പ്രൊഡക്ഷന്‍ വാറïുമായി ചെന്ന് കസ്റ്റഡിയിലെടുക്കുകയായിരുന്നു.
വടകരയിലെത്തിച്ച പ്രതികളെ ജുഡീഷ്യല്‍ ഫസ്റ്റ് ക്ലാസ് മജിസ്‌ട്രേറ്റ് കോടതിയില്‍ ഹാജരാക്കി 14 ദിവസത്തേക്ക് റിമാന്റ് ചെയ്തു. വടകര സി.ഐ എ. ഉമേഷ്, എസ്.ഐ സുധാകരന്‍, എ.എസ്.ഐ വിജയന്‍, സീനിയര്‍ സി.പി.ഒ കെ.പി രാജീവന്‍, സി.പി.ഒ ഷാജി എന്നിവരാണ് അന്വേഷണ സംഘത്തിലുïായിരുന്നത്.