കൗണ്ടന്‍: പാക്കിസ്ഥാനെ തകര്‍ത്തെറിഞ്ഞു ഏഷ്യന്‍ ചാമ്പ്യന്‍സ് ട്രോഫി ഹോക്കിയില്‍ ഇന്ത്യ ജേതാക്കള്‍.

ബദ്ധവൈരികളായ പാക്കിസ്താനെ രണ്ടിനെതിരേ മൂന്നു ഗോളുകള്‍ക്കാണ് ഇന്ത്യന്‍ ടീം വിജയം കൈപിടിയിലൊതിക്കിയത്.

നിലവിലെ ചാമ്പ്യന്‍മാരായ പാക്കിസ്ഥാനില്‍ നിന്നാണ് ഏഷ്യന്‍ ഹോക്കി കിരീടം ഇന്ത്യ പിടിച്ചെടുത്തത്.

രണ്ടു ഗോളുകള്‍ക്കു പിന്നിലായിരുന്ന പാക്കിസ്താന്‍ പൊരുതിനോക്കിയെങ്കിയും നാലാം പകുതിയിലെ ഗോളോടെ ഇന്ത്യ വിജയം പിടിച്ചെടുക്കുകയായിരുന്നു.

സെമിയില്‍ ഇന്ത്യന്‍ വിജയത്തിന്റെ ശില്‍പിയായ മലയാളിതാരം ശ്രീജേഷ് പരുക്കിനെ തുടര്‍ന്ന് കളത്തിലിറങ്ങിയില്ല.

രൂപീന്ദ്രപാല്‍ സിംഗ്, അഫാന്‍ യൂസഫ്, നിക്കന്‍ തിമ്മയ്യ എന്നിവരാണ് ഇന്ത്യക്ക് വേണ്ടി ഗോള്‍ നേടിയത്. അലി ബിലാല്‍ , അലി ഷാന്‍ എന്നിവരാണ് പാകിസ്ഥാന് വേണ്ടി ഗോള്‍ നേടിയത്.

ജസ്ജിതും രമണ്‍ദീപും ചേര്‍ന്ന മുന്നേറ്റമാണ് വിജയ ഗോളില്‍ ഇന്ത്യയെ എത്തിച്ചത്. തൊട്ടുപിന്നാലെ പാക്കിസ്ഥാന് അനുകൂലമായി പെനാല്‍റ്റി കോര്‍ണര്‍ ലഭിച്ചെങ്കിലും ഗോളാക്കാനായില്ല.

11 ഗോളുമായി രൂപീന്ദര്‍ പാല്‍ സിംഗാണ് ടൂര്‍ണമെന്റ് ടോപ് സ്‌കോറര്‍.

സെമിയില്‍ ദക്ഷിണകൊറിയയ്‌ക്കെതിരേ നായകന്‍ ശ്രീജേഷിന്റെ മികവിലാണ് ഇന്ത്യ വിജയംകണ്ടത്. ഷൂട്ടൗട്ടില്‍ 5-4 നായിരുന്നു ഇന്ത്യയുടെ വിജയം.

മലേഷ്യയെ 3-2 ന് പരാജയപ്പെടുത്തിയാണ് പാക്കിസ്ഥാന്‍ ഫൈനലില്‍ ഇടംപിടിച്ചത്. 2011ല്‍ തുടങ്ങിയ ചാമ്പ്യന്‍ഷിപ്പിലെ പ്രഥമ ചാമ്പ്യന്‍ ഇന്ത്യയായിരുന്നു. കഴിഞ്ഞ തവണ പാകിസ്താനായിരുന്നു കിരീട ജേതാക്കള്‍