വാഷിങ്ടണ്‍: യു.എസ് പ്രസിഡന്റ് ബരാക് ഒബാമ വൈറ്റ്ഹൗസിലെ ഓവല്‍ ഓഫിസില്‍ ദീപാവലി ആഘോഷിച്ചു. യു.എസ് ചരിത്രത്തില്‍ ആദ്യമായാണ് ഒരു പ്രസിഡന്റ് ഔദ്യോഗിക വസതിയില്‍ ദീപാവലി ആഘോഷിക്കുന്നത്. തന്റെ പിന്‍ഗാമികളും ദീപാവലി ആഘോഷം തുടരുമെന്നു പ്രതീക്ഷിക്കുന്നതായി ഒബാമ പറഞ്ഞു. വിളക്കു കൊളുത്തി ആഘോഷം നടത്തുന്നതിന്റെ ചിത്രവും വിവരങ്ങളും ഒബാമ സാമൂഹിക മാധ്യമങ്ങളിലൂടെ പുറത്തുവിട്ടു.
ഹിന്ദു, ജൈന, സിഖ്, ബുദ്ധ മതസ്ഥരായ കോടിക്കണക്കിനുപേര്‍ ദീപാവലി ആഘോഷിക്കുന്നുണ്ടെന്നും ഇരുട്ടിനെ വെളിച്ചത്തിലേക്കു നയിക്കുന്നതിന്റെ പ്രതീകമാണു വിളക്കെന്നും ഒബാമ ഫേസ്ബുക്ക് പോസ്റ്റില്‍ പറഞ്ഞു. ഈ വര്‍ഷം ഓവല്‍ ഓഫിസില്‍ ആദരവോടെ ദീപാവലി ആഘോഷിച്ചുവെന്നും അദ്ദേഹം അറിയിച്ചു.
ദീപാവലി ആഘോഷവേളയില്‍ കുടുംബത്തോടൊപ്പം ആശംസകള്‍ കൈമാറിയ ഒബാമ, സമാധാനവും സന്തോഷവും കൈവരട്ടെയെന്നു പ്രത്യാശിച്ചു. ഇന്ത്യാ സന്ദര്‍ശന വേളയില്‍ മുംബൈയില്‍വച്ച് ഭാര്യ മിഷേലിനോടൊപ്പം ദീപാവലി ആഘോഷിച്ചതും നൃത്തം ചെയ്തതും ഒബാമ ഓര്‍മിച്ചു.
വൈറ്റ്ഹൗസിലെ ഇന്ത്യന്‍ വംശജരായ ഉദ്യോഗസ്ഥരും ഒബാമയ്‌ക്കൊപ്പം ആഘോഷത്തില്‍ പങ്കുചേര്‍ന്നു.
ഒബാമയുടെ ഫേസ്ബുക്കിലെ 'ദീപാവലി പോസ്റ്റ് ' ഒന്നര ലക്ഷം പേര്‍ ലൈക്ക് ചെയ്യുകയും 33,000ത്തോളം പേര്‍ ഷെയര്‍ ചെയ്യുകയും ചെയ്തു.