കൊച്ചി: സമസ്ത കേരളാ സാഹിത്യപരിഷത്തിന്റെ ഈ വര്‍ഷത്തെ മലയാള ഭാഷാ ദിനാഘോഷം കേരളപ്പിറവി ദിനമായ ഇന്നുമുതല്‍ മൂന്ന് ദിവസങ്ങളിലായി മഹാകവി ജി ഓഡിറ്റോറിയത്തില്‍ നടക്കും. രാവിലെ പത്ത് മണിക്ക് പരിഷത്ത് പ്രസിഡന്റ് എം. ലീലാവതിയുടെ അധ്യക്ഷതയില്‍ പ്രമുഖ കഥാകൃത്ത് സേതു പരിപാടി ഉദ്ഘാടനം ചെയ്യും. ഉച്ചയ്ക്ക് രണ്ടുമണിക്ക് നടക്കുന്ന കവി സമ്മേളനത്തില്‍ ഡോ. അമ്പലപ്പുഴ ഗോപകുമാര്‍ അധ്യക്ഷനായിരിക്കും. സെബാസ്റ്റ്യന്‍, കലേഷ്, ആര്യാംബിക തുടങ്ങിയവര്‍ പങ്കെടുക്കും.അന്തരിച്ച മുന്‍ പരിഷത്ത് അധ്യക്ഷന്മാരുടെ ഛായാചിത്രങ്ങളുടെ അനാഛാദനവും ചടങ്ങില്‍ നടക്കും. സി. രാധാകൃഷ്ണന്‍, പ്രൊഫ. എസ്.കെ വസന്തന്‍, കെ. ജയകുമാര്‍ തുടങ്ങിയവര്‍ പങ്കെടുക്കും. രണ്ട്, മൂന്ന് തിയതികളില്‍ സാഹിത്യസമ്മേളനങ്ങളും നടക്കും.