ചെറുവത്തൂര്‍: പാദവാര്‍ഷിക പരീക്ഷയിലെ കുട്ടികളുടെ പഠനിലവാരം സര്‍വശിക്ഷാ അഭിയാന്‍ വിലയിരുത്തുന്നു. ഓരോ കുട്ടിയെയും പഠനനേട്ടങ്ങളുടെ അവകാശിയാക്കി 'പൊതു വിദ്യാലയങ്ങളെ മികവിന്റെ കേന്ദ്രങ്ങളാക്കുക' എന്നതാണ് ലക്ഷ്യം. കുട്ടികളുടെ പഠനില സൂക്ഷ്മമായി വിലയിരുത്തി പരിഹാര പ്രവര്‍ത്തനങ്ങള്‍ ആസൂത്രണം ചെയ്യാനാണ് തീരുമാനം.
ബി.ആര്‍.സി കള്‍ വഴി ശേഖരിച്ച ഉത്തരക്കടലാസുകള്‍ ജില്ലാ തലത്തില്‍ ശില്പശാലകള്‍ സംഘടിപ്പിച്ചു കൊണ്ടാണ് വിശകലനം നടത്തി റിപ്പോര്‍ട്ടുകള്‍ തയാറാക്കുന്നത്. വിഷയം കൈകാര്യം ചെയ്യുന്ന അധ്യാപകര്‍ ബി.ആര്‍.സി പരിശീലകര്‍, ഡയറ്റ് ഫാക്കല്‍റ്റി അംഗങ്ങള്‍ , ഉപജില്ലാ വിദ്യാഭ്യാസ ഓഫിസര്‍മാര്‍ എന്നിവര്‍ ഉള്‍പ്പെടുന്ന സംഘമാണ് ശില്‍പശാലകളില്‍ പങ്കെടുക്കുന്നത്. ഇതിന്റെ കണ്ടെത്തലുകളും, പരിഹാര നിര്‍ദേശങ്ങളും, നവംബര്‍ അഞ്ചിനു നടക്കുന്ന ക്ലസ്റ്റര്‍ പരിശീലനത്തില്‍ അവതരിപ്പിച്ച്, ആവശ്യമായ പ്രവര്‍ത്തന പാക്കേജിന് രൂപം നല്‍കും. ജില്ലയില്‍ വിവിധ ബി.ആര്‍.സി കളിലായാണ് വിഷയങ്ങളിലെ പഠനിലവാരം വിശകലന വിധേയമാക്കുന്നത്. ചെറുവത്തൂര്‍ ബി.ആര്‍.സി യില്‍ രണ്ടാം തരത്തിലെ ഭാഷ, ഗണിതം, പരിസര പഠനം, ഇംഗ്ലീഷ് എന്നീ വിഷയങ്ങളുടെ പഠനമാണ് നടന്നത്. ഓരോ വിഷയത്തിലും ജില്ലയിലെ വിവിധ വിദ്യാലയങ്ങളില്‍ നിന്നും ശേഖരിച്ച 50 കുട്ടികളുടെ ഉത്തരക്കടലാസുകള്‍ സൂക്ഷമമായി വിലയിരുത്തി റിപ്പോര്‍ട്ട് ജില്ലാതലത്തില്‍ ക്രോഡീകരിക്കും.