വൈദ്യുതി ബന്ധം പൂര്‍ണമായി പുനസ്ഥാപിക്കാനായില്ല
കാട്ടാക്കട: ശനിയാഴ്ച ഉണ്ടായ കനത്ത മഴയിലും കാറ്റിലും  കാട്ടാക്കടയില്‍ വ്യാപക നാശനഷ്ടം. 50 തോളം വീടുകളില്‍ മരങ്ങള്‍ കടപുഴകി വീണു കേടുപാടുകള്‍ സംഭവിച്ചു. ഒരു ഡസനിലേറെ വീടുകള്‍  പൂര്‍ണമായും തകര്‍ന്നു. വ്യാപകമായ കൃഷി നാശവും സംഭവിച്ചു.
കാട്ടാക്കട കാവിന്‍  പുറത്തു അഷറഫിന്റെ വീടിനു മേല്‍  മരം കടപുഴകി വീണു അഷറഫിനും  മകള്‍ക്കും പരിക്കേറ്റു. ഇവര്‍  സമീപ ആശുപത്രിയില്‍ ചികിത്സ തേടി. മേച്ചിറ  ഉണ്ടാപ്പാറ, കുള തോട്ടു മല, കൊല്ലോട്, പുതുവയ്ക്കല്‍, വടക്കേക്കര, കൊണ്ണിയൂര്‍, കാപ്പി വിള, തുരുമ്പ. പൂവച്ചല്‍, നാക്കര, തുടങ്ങി  നിരവധി സ്ഥലങ്ങളില്‍ വീടുകള്‍ തകര്‍ന്നു .ശനിയാഴ്ച വൈകുന്നേരം അഞ്ചു മണിയോടെ തകരാറിലായ വൈദ്യുത ബന്ധം ഇന്നലെ രാത്രിയിലും പൂര്‍ണമായി പരിഹരിക്കാന്‍ കഴിഞ്ഞിട്ടില്ല. കാട്ടാക്കട, പൂവച്ചല്‍, മലയിന്‍കീഴ്, കള്ളികാട്, വിളപ്പില്‍ പഞ്ചായത്തിലെ ഒരു ഭാഗം എന്നിവിടങ്ങളില്‍  വൈദ്യുതി ബന്ധം പൂര്‍ണമായി  തകരാറിലായിരുന്നു. ബഥനിപുരം, കാക്കമുകള്‍, ചൂണ്ടുപലക, ഊറ്റ് കുഴി, ഊന്നാന്‍ പാറ, പെരുംകുളം, ശാസ്താ നാഗര്‍, കമുകിന്‍ കുഴി, ചാരു പാറ, കാവനാട്ട് കോണം, ബര്‍മ്മ റോഡ്, ചായ്ക്കുളം,തുരുംബാട്, തൂങ്ങാം പാറ മേച്ചിറ, കൊല്ലകോണം കുരുതം കോട് എന്നിവിടങ്ങളില്‍ ശക്തമായ കാറ്റില്‍ മരങ്ങള്‍  കടപുഴകി  വൈദ്യുത കമ്പിയില്‍ പതിച്ചു അഞ്ഞൂറോളം  വൈദ്യുത തൂണുകള്‍ മറിഞ്ഞു.
പലയിടങ്ങളിലും കെ.എസ്.ഇ.ബി ജീവനക്കാരും നാട്ടുകാരും ചേര്‍ന്നാണ്  തകരാറിലായ പോസ്റ്റുകളും വൈദ്യുത ലൈനുകളും പുനസ്ഥാപിക്കുന്നത്. ഇന്നലെയും വിവിധ ഇടങ്ങളില്‍ മരങ്ങള്‍  കടപുഴകുകയും വീടുകള്‍ക്ക് നാശം സംഭവിക്കുകയും ചെയ്തു.