പേരൂര്‍ക്കട: കഴിഞ്ഞ രണ്ടുമാസമായി ഓടയിലൂടെ കക്കൂസ് മാലിന്യം ഒഴുകിയിട്ടും  നടപടിയുണ്ടാകുന്നില്ലെന്ന് പരാതി.
മണ്ണന്തല ജങ്ഷനു സമീപം വയമ്പാച്ചിറ കുളത്തിനരികിലെ ഓടയിലൂടെയാണ്  കക്കൂസ് മാലിന്യം ഒഴുകുന്നത്. സമീപത്തെ വീടുകളില്‍നിന്നാണോ ഫ്‌ളാറ്റില്‍ നിന്നാണോ മാലിന്യം ഒഴുക്കിവിടുന്നതെന്നു
കണ്ടെത്താന്‍പോലും  നഗരസഭാധികൃതര്‍ മിനക്കെട്ടിട്ടില്ല. മണ്ണന്തല ജങ്ഷനു സമീപത്തുനിന്ന് ഒഴുകിവരുന്ന മാലിന്യം ഒരു ഓഡിറ്റോറിയത്തിനു സമീപത്തെത്തിയശേഷം കെട്ടിക്കിടക്കുകയാണ്. ഇതില്‍  കുറച്ചുഭാഗം ഒഴുകി സമീപത്തെ തോട്ടിലേക്കിറങ്ങുന്നുണ്ട്.
മണ്ണന്തല റസി. അസോസിയേഷന്‍ പരിധിയിലുള്ളവര്‍ വാര്‍ഡ് കൗണ്‍സിലറോടു പരാതിപ്പെട്ടുവെങ്കിലും അദ്ദേഹം കേട്ടഭാവംപോലും നടിക്കുന്നില്ലെന്നും ആക്ഷേപമുണ്ട്.