മേപ്പാടി: പ്രകൃതിക്ഷോഭം ഉള്‍പ്പടെയുള്ള ദുരന്ത സ്ഥലത്തേക്കും പകര്‍ച്ച വ്യാതികള്‍ പടരുന്ന സ്ഥലങ്ങളിലും ഓടിയെത്താന്‍ സ്ത്രീകള്‍ മാത്രം അംഗങ്ങളായുള്ള കര്‍മസേനയുടെ പ്രവര്‍ത്തനം ആരംഭിച്ചു. മേപ്പാടി ഗ്രാമ പഞ്ചായത്തിന്റെ സഹകരണത്തോടെ കുടുംബശ്രീയാണ് കര്‍മ സേനക്ക് രൂപം നല്‍കിയത്. പ്രത്യേക പരിശീലനം പൂര്‍ത്തിയാക്കിയവരാണ് സേനയിലെ അംഗങ്ങള്‍. സ്ത്രീകള്‍ രക്ഷാ പ്രവര്‍ത്തന മേഖലയിലേക്ക് ഇത്തരത്തില്‍ രംഗത്തിറങ്ങുന്നത് ജില്ലയില്‍ ആദ്യമായാണ്. ഗ്രാമ പഞ്ചായത്ത് പ്രസിഡന്റ് കെ.കെ സഹദാണ് ഈ ആശയത്തിന് പിന്നില്‍. പൊലിസിന്റെ സഹായത്തോടെ കൂടുതല്‍ പരിശീലനം നേടുകയാണ് അടുത്ത ലക്ഷ്യം. കുടുംബശ്രീ സി.ഡി.എസിന്റെ ഏറ്റവും പുതിയ സംരഭമാണ് കര്‍മസേന എന്ന് കോഡിനേറ്റര്‍ മിനി പറഞ്ഞു.