മഞ്ചേശ്വരം: മെഡിക്കല്‍ ഷോപ്പില്‍ പോയി വീട്ടിലേക്ക് മടങ്ങുകയായിരുന്ന രണ്ട് വിദ്യാര്‍ഥികളെ വാനിലെത്തിയ സംഘം തട്ടിക്കൊണ്ടു പോകാന്‍ ശ്രമിച്ചതായി പരാതി. ഇന്നലെ രാത്രി ഏഴരയോടെ ഉപ്പള മണ്ണംകുഴിയിലാണ് സംഭവം. നാട്ടുകാര്‍ വിവരമറിയിച്ചതിനെ തുടര്‍ന്ന് മഞ്ചേശ്വരം പൊലിസ് അന്വേഷണം തുടങ്ങി.
മണ്ണംകുഴിയിലെ 14,12 വയസുള്ള രണ്ട് വിദ്യാര്‍ഥികളെയാണ് സംഘം തട്ടിക്കൊണ്ടുപോകാന്‍ ശ്രമിച്ചത്.
വീട്ടുകാര്‍ മെഡിക്കല്‍ ഷോപ്പില്‍ മരുന്നു വാങ്ങാനായി അയച്ചതായിരുന്നു ഇരുവരെയും. ഇരുവരും വീടിനു സമീപത്തു തന്നെയുള്ള മെഡിക്കല്‍ ഷോപ്പില്‍ നിന്നും മരുന്നു വാങ്ങി വരുന്നതിനിടെ വാനിലെത്തിയ സംഘം ഇരുവരെയും വാനില്‍ പിടിച്ചു കയറ്റാന്‍ ശ്രമിക്കുകയായിരുന്നു. ഈ സമയം കുട്ടികള്‍ ഓടി രക്ഷപ്പെടുകയായിരുന്നു.
ഇതിനിടെ വാനിലെത്തിയ സംഘം കുട്ടികളെ പിന്തുടര്‍ന്നു. കുട്ടികള്‍ ഓടി വീട്ടില്‍ കയറുന്നതു കണ്ടപ്പോഴാണ് സംഘം അവിടെ നിന്നും രക്ഷപ്പെട്ടത്.
വാനില്‍ മൂന്നുപേരാണുണ്ടായിരുന്നതെന്ന് കുട്ടികള്‍ പറഞ്ഞു. കുട്ടികളെ തട്ടിക്കൊണ്ടുപോകാന്‍ ശ്രമിച്ച സംഭവത്തെ പൊലിസ് ഗൗരവത്തോടെയാണ് കാണുന്നത്. നേരത്തെയും സമാനമായ സംഭവങ്ങള്‍ ജില്ലയുടെ വിവിധ ഭാഗങ്ങളില്‍ ഉണ്ടായിട്ടുണ്ട്.