കാളികാവ്: എ.ടി.എം തട്ടിപ്പ് വ്യാപകമായതോടെ സുരക്ഷാ നടപടികള്‍ ശക്തമാക്കാനുള്ള നിര്‍ദേശങ്ങളുമായി പൊലിസ് രംഗത്ത്. കാളികാവ് എസ്.ഐ കെ.പി സുരേഷ് ബാബുവിന്റെ നേതൃത്വത്തിലാണ് മലയോരത്ത് ജാഗ്രതാ നടപടികള്‍ ആരംഭിച്ചിട്ടുള്ളത്. നടപടിയുടെ ഭാഗമായി മലയോരത്തെ ബാങ്ക് മാനേജര്‍മാരുടെ യോഗം വിളിച്ചു ചേര്‍ത്തു.
ഫോണ്‍ വിളികളില്‍ ഉപഭോക്താക്കള്‍ വഞ്ചിതരാകുന്നതാണ് തട്ടിപ്പ് വര്‍ധിക്കാന്‍ കാരണമാകുന്നതെന്നാണ് ബാങ്ക് അധികൃതര്‍ പറഞ്ഞു. തൊഴിലുറപ്പു തൊഴിലാളികള്‍ ഉള്‍പടെയുള്ള സാധാരണക്കാര്‍ തട്ടിപ്പിനിരയാകുന്നതിന് ഓരോ ബാങ്കുകളും അവരുടെ അക്കൗണ്ട് ഉടമകള്‍ക്ക് പ്രത്യേക നിര്‍ദേശങ്ങള്‍ നല്‍കണമെന്നും തട്ടിപ്പിന്റെ രീതികളെ മനസിലാക്കി കൊടുക്കാന്‍ തയാറാകണമെന്നുമാണ് പൊലിസ് മുന്നോട്ടുവച്ച നിര്‍ദേശം.
ഫോണ്‍ വിളികളില്‍ ചോര്‍ത്തിയെടുക്കുന്ന എ.ടി.എം കാര്‍ഡിന്റെ രഹസ്യ നമ്പര്‍ ഫോണ്ടുകളില്‍ സേവ് ചെയ്തുവെക്കുന്നത് ഉപഭോക്താക്കള്‍ ശ്രദ്ധിക്കണമെന്നും ഫോണില്‍ നിന്ന് നമ്പറുകള്‍ ചോര്‍ത്തിയെടുക്കുന്നത് തടയാന്‍ നിലവില്‍ സംവിധാനമില്ലെന്നും യോഗം വിലയിരുത്തി.
വ്യാജ കാര്‍ഡുകളുപയോഗിച്ചുള്ള പണമിടപാട് തടയുവാനുള്ള സംവിധാനം ബാങ്ക് അധികൃതര്‍ സ്വീകരക്കണമെന്ന നിര്‍ദേശവുമുണ്ടായി.
വിവിധ ബാങ്ക് സ്ഥാപനങ്ങളിലെ പ്രതിനിധികള്‍ യോഗത്തില്‍ പങ്കെടുത്തു. കാളികാവ് എസ്.ഐ കെ.പി സുരേഷ് ബാബു, എ.എസ്.ഐ ജോര്‍ജ്, സിവില്‍ പൊലിസ് ഓഫീസര്‍ പ്രവീണ്‍, സുവര്‍ണ തുടങ്ങിയവര്‍ സംസാരിച്ചു.