തിരുവനന്തപുരം: വികസന പ്രവര്‍ത്തനങ്ങള്‍ക്ക് തുരങ്കം വയ്ക്കുന്ന സാങ്കേതിക തടസവാദങ്ങള്‍ അനുവദിക്കില്ലെന്ന് ജില്ലാ കലക്ടര്‍ എസ്.വെങ്കടേസപതി. കളക്ടറേറ്റ് കോണ്‍ഫറന്‍സ് ഹാളില്‍ ചേര്‍ന്ന എം.പി.എല്‍.എ.ഡി.എസ് റിവ്യു യോഗത്തില്‍ അധ്യക്ഷം വഹിക്കുകയായിരുന്നു അദ്ദേഹം.
എം.പിമാര്‍ കൊണ്ടു വരുന്ന പദ്ധതികള്‍ ഇഴഞ്ഞുനീങ്ങുന്നതായി പരാതികള്‍ ഏറി വരുന്നു. ജനപ്രതിനിധികള്‍ നാടിന്റെ വികസനത്തിനു വേണ്ടിയാണ് പദ്ധതികള്‍ ആസൂത്രണം ചെയ്യുന്നതന്ന ബോധ്യം ഉദ്യോഗസ്ഥര്‍ക്ക് ഉണ്ടാകണം. സാങ്കേതിക ബുദ്ധിമുട്ടുകള്‍ ഉള്‍പ്പെടെയുള്ള തടസവാദങ്ങള്‍ ഉന്നയിച്ച് പദ്ധതി ഇല്ലാതാക്കാനുള്ള ശ്രമങ്ങള്‍ അനുവദിക്കില്ല. നാട്ടുകാര്‍ക്ക് ഉപയുക്തമാകുന്ന പദ്ധതികള്‍ ജനപ്രതിനിധികള്‍ ആവിഷ്‌ക്കരിക്കുമ്പോള്‍ അത് സ്വന്തമെന്ന് കരുതി ഏറ്റെടുത്തുകൊണ്ടുള്ള പ്രവര്‍ത്തനം ഉദ്യോഗസ്ഥതലത്തില്‍ നിന്നുണ്ടാകണമെന്നും കലക്ടര്‍ നിര്‍ദേശിച്ചു. പദ്ധതികള്‍ വേഗത്തിലാക്കുന്നതിനുള്ള നടപടികള്‍ ഉണ്ടാകണമെന്ന് ശശിതരൂര്‍ എം.പിയുടെ പ്രതിനിധിയായെത്തിയ ഷിബു യോഗത്തില്‍ ആവശ്യപ്പെട്ടു. പ്രവര്‍ത്തികളുടെ ഗുണനിലവാരമുറപ്പാക്കണം. പദ്ധതികളുടെ ഓഡിറ്റ് യൂട്ടിലിറ്റി സര്‍ട്ടിഫിക്കറ്റ് നല്‍കുന്നതിനുള്ള നടപടികളും സ്വീകരിക്കണമെന്ന് എം.പിയുടെ പ്രതിനിധി ആവശ്യപ്പെട്ടു. ജില്ലാ പ്ലാനിങ് ഓഫിസര്‍ വി.എസ് ബിജുവിന്റെ നേതൃത്വത്തില്‍ മൊത്തം 202 പദ്ധതികള്‍ യോഗത്തില്‍ വിശകലനം ചെയ്തു.
ശശി തരൂര്‍, എ.കെ.ആന്റണി, സി.പി നാരായണന്‍ എന്നീ എം.പിമാരുടെയും മുന്‍.എം.പി  ടി.എന്‍ സീമയുടെയും പദ്ധതികളാണ് യോഗത്തില്‍ അനന്തര നടപടി പരിശോധനകള്‍ക്ക് വിധേയമാക്കിയത്.