ചെന്ത്രാപ്പിന്നി: ചെന്ത്രാപ്പിന്നി ഹയര്‍സെക്കന്ററി സ്‌കൂളില്‍ പുതിയതായി നിര്‍മിച്ച കെട്ടിടത്തിന്റെ ഉദ്ഘാടനം നാളെ നടത്തുമെന്ന് ഭാരവാഹികള്‍ വാര്‍ത്താ സമ്മേളനത്തില്‍ അറിയിച്ചു. ഉച്ചക്ക് ഒരു മണിക്ക് നടക്കുന്ന ചടങ്ങില്‍ വിദ്യാഭ്യാസ വകുപ്പ് മന്ത്രി പ്രൊഫ. സി.രവീന്ദ്രനാഥ് പുതിയ കെട്ടിടത്തിന്റെ ഉദ്ഘാടനം നിര്‍വഹിക്കും. ഇ.ടി ടൈസന്‍ മാസ്റ്റര്‍ എം.എല്‍.എ അധ്യക്ഷനാവും. ഇരിങ്ങാലക്കുട എം.എല്‍.എ പ്രൊഫ. കെ.യു അരുണന്‍ മുഖ്യപ്രഭാഷണം നടത്തും. എടത്തിരുത്തി ഗ്രാമപഞ്ചായത്ത് പ്രസിഡന്റ് ബൈന പ്രദീപ് മുഖ്യാതിഥിയാകും. സ്‌കൂള്‍ മാനേജര്‍ ഉഷ ശങ്കരനാരായണന്‍ ഉപഹാര സമര്‍പ്പണവും മുന്‍ മാനേജര്‍ കെ.സി പ്രകാശന്‍ താക്കോല്‍ സമര്‍പണവും നടത്തും. പ്രധാന അധ്യാപകന്‍ പി.ബി കൃഷ്ണകുമാര്‍, ജനറല്‍ കണ്‍വീനര്‍ ടി.എന്‍ അജയകുമാര്‍, സ്‌കൂള്‍ മാനേജര്‍ ഉഷ ശങ്കരനാരായണന്‍, ടി.കെ ഗോപിനാഥന്‍, ടി.എ സഗീര്‍, ടി.വി സജീവ്, ടി.എ റഷീദ് എന്നിവര്‍ വാര്‍ത്താ സമ്മേളനത്തില്‍ പങ്കെടുത്തു.

റോഡരികില്‍ കക്കൂസ് മാലിന്യം തള്ളി

പുത്തന്‍ചിറ: മാരേക്കാട് കുന്നത്തേരി റോഡരികില്‍ കക്കൂസ് മാലിന്യം തള്ളി. പുത്തന്‍ചിറ ഗ്രാമപഞ്ചായത്തിലെ ഏഴാം വാര്‍ഡില്‍ പെട്ട റോഡിലാണ് രാത്രിയില്‍ കക്കൂസ് മാലിന്യം തള്ളിയത്. പുത്തന്‍ചിറ ഗ്രാമപഞ്ചായത്ത് വാര്‍ഡ് മെമ്പര്‍മാരായ വി.എ നദീര്‍, പി.ഐ നിസാര്‍ എന്നിവര്‍ സ്ഥലം സന്ദര്‍ശിച്ച ശേഷം മാള പൊലിസില്‍ പരാതി നല്‍കി.
അസമയങ്ങളില്‍ റോഡിലെ വിജന സ്ഥലങ്ങളില്‍ നിര്‍ത്തിയിട്ടിരിക്കുന്ന ടാങ്കര്‍ ലോറി പോലുള്ള വാഹനങ്ങള്‍ നിരീക്ഷിക്കണമെന്നും അത്തരം വാഹനങ്ങളുടെ നമ്പര്‍ ബന്ധപ്പെട്ടവരെ അറിയിക്കാന്‍ നാട്ടുകാര്‍ ശ്രദ്ധിക്കണമെന്നും വാര്‍ഡ് മെമ്പര്‍മാര്‍ പറഞ്ഞു. ജനകീയ നിരീക്ഷണത്തിലൂടെ കുറ്റക്കാരെ നിയമത്തിന് മുന്നില്‍ കൊണ്ടുവരാന്‍ കഴിയൂ എന്നും അധികൃതര്‍ അറിയിച്ചു. ഈ പ്രദേശത്ത് നിരീക്ഷണ ക്യാമറ സ്ഥാപിക്കാന്‍ ശ്രമിക്കുമെന്നും ഗ്രാമപഞ്ചായത്ത് അംഗങ്ങള്‍ അറിയിച്ചു.