ആനക്കര: കുമ്പിടി ആനക്കര റോഡിന്റെ നിര്‍മാണ പ്രവൃത്തി തുടങ്ങി. കുമ്പിടി ആനക്കര റോഡില്‍ ഡ്രൈനേജുകളുടെ നിര്‍മാണം, തകര്‍ന്ന പാലങ്ങളുടെ നിര്‍മാണം എന്നിവയാണ് നടക്കുന്നത്. കുമ്പിടി സെന്ററിലുളള പാലത്തിന് പൊട്ടല്‍ വീണിരുന്നു. ഇത് പുതുക്കി പണിയല്‍, പന്നിയൂര്‍ റോഡില്‍ രണ്ട് പാലങ്ങളുടെ നിര്‍മാണമടക്കം മൂന്ന് ഓവുപാലങ്ങളുടെ നിര്‍മ്മാണമാണ് ഇപ്പോള്‍ തകൃതിയായി നടക്കുന്നത്.
കുമ്പിടി മുതല്‍ ആനക്കര വരെയുളള റോഡില്‍ വെളളം ഒഴുകിപ്പോകുന്നതിന് തടസമുളള ഭാഗങ്ങളില്‍ പുതുതായി ഓവ് പാലം നിര്‍മ്മിക്കുമെന്നും പറയുന്നു. ആനക്കര സെന്ററിന് സമീപമുളള ഒരു ഓവുപാലം ഇപ്പോള്‍ അടഞ്ഞു കിടക്കുകയാണ്.  ഇത് മൂലം ആനക്കര അങ്ങാടിയുളള മഴവെളളം ഒഴുകി പോകുന്നതിന് തടമുണ്ടാക്കുന്നുണ്ട്.
ഇത് പരിഹരിക്കാന്‍ നിലവിലുണ്ടായിരുന്ന ഓവ് പാലം പുതുക്കി പണിത് ആനക്കര സെന്ററില്‍ റോഡിന്റെ ഇരുവശവും ഡ്രൈനേജ് നിര്‍മിക്കണമെന്നാവശ്യവും ഉയര്‍ന്നിട്ടുണ്ട്. ഓവുപാലങ്ങളുടെ നിര്‍മാണവും ഡ്രൈനേജുകളുടെ നിര്‍മാണവും പൂര്‍ത്തിയാകുന്നതോടെ കുമ്പിടിമുതല്‍ ആനക്കരവരെയുളള റോഡ് വീതികൂട്ടി ടാറിങ്ങ് നടക്കും. മൂന്ന് കോടി അറുപത് ലക്ഷം രൂപയുടെ നിര്‍മ്മാണ പ്രവര്‍ത്തനമാണ് നടത്തുന്നത്.