ഹാസന്‍: കര്‍ണാടകയില്‍ നാട്ടിലിറങ്ങിയ കാട്ടാനകൂട്ടം നാട്ടുകാരുടെ ഉറക്കെ കെടുത്തുന്നു. 20 കാട്ടാനകളാണ് സക്ലേശ്പൂരിലെ ബേജ് ഗ്രാമത്തിലെ ഒരു എസ്റ്റേറ്റില്‍ ക്യാംപ് ചെയ്തിരിക്കുന്നത്.
നാട്ടുകാര്‍ അറിയിച്ചതിനെതുടര്‍ന്ന് കാട്ടാനകളെ തുരത്തിയോടിക്കാന്‍ വനംവകുപ്പ് അധികൃതര്‍ എത്തിയെങ്കിലും നടന്നില്ല. കാട്ടാനകൂട്ടം ക്യാംപ് ചെയ്യുന്ന സ്ഥലത്തിനടുത്ത് രണ്ട് സ്‌കൂളുകള്‍ പ്രവര്‍ത്തിക്കുന്നുണ്ട്. ആനക്കൂട്ടം ആക്രമിക്കുമെന്ന പേടിയില്‍ കുട്ടികളെ സ്‌കൂളില്‍ വിടാന്‍ രക്ഷിതാക്കള്‍ ഭയപ്പെടുകയാണ്. പടക്കംപൊട്ടിച്ചും മറ്റും ആനകളെ തുരത്തിയോടിക്കാനുള്ള ശ്രമവും പരാജയപ്പെട്ടതായി നാട്ടുകാര്‍ പറഞ്ഞു. കാട്ടാനക്കൂട്ടം തൊട്ടടുത്ത ഹൈവേയിലേക്ക് ഇറങ്ങാതിരിക്കാന്‍ വനംവകുപ്പ് നീക്കം നടത്തുന്നുണ്ട്.