മലപ്പുറം: ഗുരുതരമായ കിഡ്‌നി രോഗം കൊണ്ട് ജീവിതം വഴിമുട്ടിയ ഹഫ്‌സത്തിന് താങ്ങായി മലപ്പുറത്തെ ഓട്ടോ ഡ്രൈവര്‍മാര്‍. ഇരു കിഡ്‌നികളും നഷ്ടപ്പെട്ട മലപ്പുറം കുന്നുമ്മല്‍ സ്വദേശി ചോലശ്ശേരി മജീദിന്റെ ഭാര്യ ഹഫ്‌സത്തിന്റെ ചികിത്സാ ചെലവിനായാണ് ഓട്ടോ ഡ്രൈവര്‍മാര്‍ കാരുണ്യഹസ്തം നീട്ടിയത്.
മലപ്പുറം കുന്നുമ്മലില്‍ സര്‍വീസ് നടത്തുന്ന 70 ഓളം ഓട്ടോറിക്ഷകള്‍ ഇന്നലെ സര്‍വീസ് നടത്തിയത് ഹഫ്‌സത്തിന്റെ ചികിത്സാ ചെലവിനുവേണ്ടിയായിരുന്നു.
ചികിത്സാ ചെലവിനാണെന്നറിഞ്ഞപ്പോള്‍ യാത്രക്കാരും സഹകരിച്ചു. രണ്ടു കിഡ്‌നികളും അടിയന്തിരമായി മാറ്റിവെക്കണമെന്നാണ് ഡോക്ടര്‍മാര്‍ നിര്‍ദേശിച്ചിട്ടുള്ളത്. ഭര്‍ത്താവും മൂന്ന് കുട്ടികളുമടങ്ങുന്നതാണ് ഹഫ്‌സത്തിന്റെ കുടുംബം. ഭര്‍ത്താവ് മജീദ് വിദേശത്താണ്.
25 ലക്ഷത്തോളം രൂപയാണ് ചികിത്സാ ചെലവ്. ഹഫ്‌സത്തിന്റെയും കുടുംബത്തിന്റെയും ദുരിതാവസ്ഥ കണ്ടറിഞ്ഞാണ് മലപ്പുറത്തെ ഓട്ടോ ഡ്രൈവര്‍മാര്‍ ഒരു ദിവസത്തെ സര്‍വീസ് ഇവര്‍ക്ക് വേണ്ടി മാറ്റിവെച്ചത്.
ഹഫ്‌സത്തിനെ സഹായിക്കാനായി പി.ഉബൈദുള്ള എംഎല്‍എ ചെയര്‍മാനായി സഹായനിധിയും രീപീകരിച്ചിട്ടുണ്ട്. ഇതിനായി എസ്.ബി.ടി മലപ്പുറം ബ്രാഞ്ചില്‍ അക്കൗണ്ട് രൂപീകരിച്ചിട്ടുണ്ട്. നമ്പര്‍: 67379200728