കയ്പമംഗലം : തിരഞ്ഞെടുപ്പ് പ്രചാരണ ബോര്‍ഡുകളും കോടി തോരണങ്ങളും ഇന്നു തന്നെ നീക്കം ചെയ്യാന്‍ പൊലീസിന്റെ കര്‍ശന നിര്‍ദ്ദേശം. വൈകിട്ട് 5ന് മുന്‍പായി പ്രചാരണ ബോര്‍ഡുകള്‍ നീക്കം ചെയ്യാത്തപക്ഷം ശക്തമായ നിയമ നടപടികള്‍ സ്വീകരിക്കും. നിയമസഭാ തെരഞ്ഞെടുപ്പിനോടനുബന്ധിച്ച് സ്ഥാനാര്‍ത്ഥികളുടെ പ്രചാരണത്തിനായി വിവിധ രാഷ്ട്രീയ പാര്‍ട്ടികളുടെ നേത്യത്വത്തില്‍ പൊതുസ്ഥലങ്ങള്‍ കയ്യേറിയും സ്വകാര്യ വ്യക്തികളുടെ സ്ഥലങ്ങളിലും വഴിയോരങ്ങളിലും സ്ഥാപിച്ചിട്ടുള്ള പ്രചാരണ സാമഗ്രികള്‍ എത്രയും വേഗം നീക്കം ചെയ്യണമെന്ന് പോലീസ് ആവശ്യപ്പെട്ടു. കൊടുങ്ങല്ലൂര്‍ സി.ഐയുടെ ഓഫീസില്‍ ചേര്‍ന്ന യോഗത്തിലാണ് പ്രസ്തുത തിരുമാനം ഉണ്ടായത്. പ്രചാരണ ബോര്‍ഡുകള്‍ നശിപ്പിച്ചുവെന്ന പരാതിയും അതിന്റെ അടിസ്ഥാനത്തിലുള്ള സംഘര്‍ഷ സാധ്യതയും ഒഴിവാക്കാനുള്ള തിരുമാനത്തിലാണ് പൊതുവെ തന്നെ പ്രശ്‌നബാധിതമെന്നു കരുതപ്പെടുന്ന മതിലകം പൊലീസ് ഏരിയയില്‍ പൊലീസ് ഈ നിര്‍ദ്ദേശം കര്‍ശനമായി നല്‍കിയിരിക്കുന്നത്. തിരഞ്ഞെടുപ്പ് സമയത്ത് തന്നെ പ്രധാനപ്പെട്ട എല്ലാ സ്ഥാനാര്‍ഥികളുടെയും പ്രചാരണ ബോര്‍ഡുകളും മറ്റും നശിപ്പിക്കപ്പെട്ടതുമായി ബന്ധപ്പെട്ടു നിരവധി പരാതികളാണ് മതിലകം പൊലീസ് സ്റ്റേഷനില്‍ ലഭിച്ചിരിക്കുന്നത്. അത് കൊണ്ട് തന്നെയാണ് കൊടുങ്ങല്ലൂര്‍ സി.ഐ സിബി ടോമിന്റെ നേതൃത്വത്തില്‍ നടത്തിയ വിവിധ രാഷ്ട്രീയ കക്ഷി നേതാക്കളുടെയും തിരഞ്ഞെടുപ്പ് ഏജന്റ്മാരുടെയും യോഗത്തിലാണ് മേഖലയില്‍ സ്ഥാപിച്ചിട്ടുള്ള പ്രചാരണ സാമഗ്രികള്‍ ബന്ധപ്പെട്ട രാഷ്ട്രീയ കക്ഷികള തന്നെ നീക്കം ചെയ്യാന്‍ തീരുമാനം ഉണ്ടായത്.