ന്യൂഡല്‍ഹി: സൗമ്യവധക്കേസില്‍ ഗോവിന്ദച്ചാമിക്കെതിരായ കൊലപാതകക്കുറ്റം റദ്ദാക്കിയതിനെതിരായ പുനപ്പരിശോധനാ ഹരജിയില്‍ ജസ്റ്റിസ് മാര്‍ക്കണ്ഡേയ കട്ജു ഇന്ന് സുപ്രിംകോടതിയില്‍ ഹാജരാകും. ഉച്ചയ്ക്കു രണ്ടിന് ജസ്റ്റിസ് രഞ്ജന്‍ ഗൊഗോയി അധ്യക്ഷനായ ബെഞ്ച് മുന്‍പാകെ ഹാജരായി കേസില്‍ തന്റെ ഭാഗം വിശദീകരിക്കുമെന്ന് കട്ജു ഫേസ്ബുക്കില്‍ അറിയിച്ചു. ഗോവിന്ദച്ചാമിയുടെ വധശിക്ഷ റദ്ദാക്കിയ സുപ്രിംകോടതി വിധിയില്‍ പിഴവുള്ളതായി സുപ്രിംകോടതി മുന്‍ ജഡ്ജി കൂടിയായ കട്ജു ഫേസ്ബുക്കില്‍ അഭിപ്രായപ്പെട്ടത് ഹരജിയായി പരിഗണിച്ചിരുന്നു. ഇന്നു നേരിട്ടെത്തി നിലപാട് വ്യക്തമാക്കാന്‍ ആവശ്യപ്പെട്ട് സുപ്രിംകോടതി അദ്ദേഹത്തിന് നോട്ടീസയക്കുകയായിരുന്നു. കട്ജുവിന്റെ നിലപാട് കൂടി കേട്ട ശേഷമാവും ഇന്നു കോടതി വിധിപുറപ്പെടുവിക്കുക. സുപ്രിംകോടതിയുടെ ചരിത്രത്തില്‍ ആദ്യമായാണ് ഒരു മുന്‍ ജഡ്ജിയോട് കോടതിയില്‍ ഹാജരായി തങ്ങള്‍ക്കു പറ്റിയ തെറ്റു ചൂണ്ടിക്കാട്ടാന്‍ കോടതി ആവശ്യപ്പെടുന്നത്.
അതേസമയം, കോടതിക്കു തെറ്റുപറ്റിയെന്ന മുന്‍ നിലപാട് കട്ജു ഇന്നലെയും ആവര്‍ത്തിച്ചു. കേസ് വിശാലബെഞ്ചിന് വിടുന്നതു സംബന്ധിച്ച് ചീഫ് ജസ്റ്റിസ് അനുകൂല നിലപാടെടുക്കുമെന്നാണു പ്രതീക്ഷ.